مەودا میدیا- سەركۆ جەمال

مستەفا كازمی، سەرۆك وەزیرانی عیراق سبەینێ بە سەردانێك دەگاتە هەرێمی كوردستان و سەرەتا لە هەولێر چاوی بە بەرپرسانی باڵای هەرێم دەكەوێت، بڕیاریشە دوو سبەی بێتە سلێمانی و چاوی بە بەرپرسانی یەكێتیی نیشتیمانیی كوردستان بكەوێت.

سەرچاوەیەك لە شاندی دانوستانكاری هەرێم لە بەغداوە بە مەودا میدیای وت"سبەینێ شاندی هەرێم كە لە بەغدایە دەگەڕێتەوە بۆ هەرێمی كوردستان و ئەنجامی گفتوگۆكان بەسەرۆكایەتی قوباد تاڵەبانی ئەرێنی بوون".

وتیشی"بەهۆی ئەوەی گفتوگۆی شاندەكە ئەرێنی بووە، بڕیارە سبەینێ مستەفا كازمی سەردانی هەولێر بكات و لەسەرەتادا چاوی بە سەرۆكی حكومەتی هەرێمی كوردستان و سەرۆكی هەرێم و بەرپرسانی حكومەت دەكەوێت، پاشانیش بۆ رۆژی دواتر دەچێتە سلێمانی و چاوی بە بەرپرسانی باڵای یەكێتیی نیشتیمانیی كوردستان دەكەوێت".

ئەو سەرچاوەیە ئەوەشی خستەڕوو"بڕیارە گفتوگۆی شاندی هەرێم و بەغدا لە هەولێر لەبارەی رێككەوتنی حكومەتی هەرێم و ناوەند درێژەیان پێبدرێت و رێككەوتنی هەرێم و بەغداش نزیكە".