مەودا میدیا- سازگار ئەحمەد

هەبوونی کارگە و غەسالەکانی چەو و لم لەسەر روباری سیروان بووەتە هۆی ناشیرین بوونی سیمای روبارەکە و زیانی ژینگەیی بە ناوچەکە گەیاندووە، ، بەڕێوەبەری نەوت و کانزاکانی گەرمیانیش رایدەگەیەنێت لایەنە پەیوەندیدارەکان کۆبوونەوە ئەنجام دەدەن و کۆمەڵێک بڕیار و راسپاردە دەردەکەن لە بەرژەوەندی ژینگە.

یادگار فەتاح، بەڕێوەبەری نەوت و کانزاکانی گەرمیان لەبارەی کێشەی غەسالەکانی سەر روباری سیروان بە مەودا میدیای راگەیاند "ئێمەی پێنجشەممەی رابردوو لەگەڵ سەرپەرشتیاری ئیدارەی گەرمیان و نوێنەری فەرمانگە پەیوەندیدارەکان چوینە سەر رووباری سیروان و غەسالەکانی چەو و لمان بەسەرکردەوە".

ئاماژەی بەوەشکرد "پلان دانراوە لە هەفتەی ئایندەدا لایەنە پەیوەندیدارەکان کۆبوونەوە ئەنجام بدەن و کۆمەڵێک بڕیار و راسپاردە دەربکەن لە بەرژەوەندی ژینگە".

 بەڕێوەبەری نەوت و کانزاکانی گەرمیان  ئەوەشی خستەڕوو "کاری غەسالەی چەو و لم تەنها لەسەر روبار و چەم ئەنجام دەدرێن، ئێمەش چەند چەمێکی وەرزی و روبارێکمان هەیە دەبێت بەشێوەیەک بڕیار بدەین کە زیان بە دارستان و ژینگە نەگەیەنێت".

س.س