مەودا میدیا - هێمن سەعید

لە ئێستادا، عیراق بەدۆخێكی نائارام و ناجێگیری قورسدا تێپەڕ دەبێت بەهۆی شڵەقاوی دۆخی سیاسی و سەربازی و ئابووری لەلایەك و فشاری دەرەكی لەلایەكی دیكەوە، وایكردووە حكومەتی شەرعی عیراق و سەرۆك وەزیرانەكەی دەست و پێسپی بەدیاریەوە سەرسام و حەیران بمێنن، لەلایەكی دیكەوە، هەڕەشەی كشانەوەی باڵیۆزخانەی ئەمەریكا لە عیراق و پێداگری ئەمەریكا بۆ سنورداركردن و هەڵوەشانەوەی میلیشیا شیعەكانی نزیك لە ئێران لەلایەك و فشاری ئێران و هێزە بەكرێگیراوەكانی لە عیراق بۆ وەدەرنانی ئەمەریكا لەلایەكی دیكەوە بووەتە خاڵی یەكلابوونەوەی دەربازبوونی عیراق لەو دۆخە خراپەی تێی كەوتووە یاخود چەقینی لوتی بەناو زەلكاوی قەیرانی سەخت و دژوار كە دوورنیە تا كەناری هەڵوەشانەوەی كیانەكەی بڕوات.

مەشخەڵ كەوڵۆسی، سەرۆكی چاوی ناوەندی كورد بۆ لێكۆڵینەوەی نیشتمان سازی، بە مەودا میدیای راگەیاند "سەرەڕای ئەوەی مستەفا كازمی، سەرۆك وەزیرانی عیراق شیعە مەزهەبە، بەڵام هیچ كات ئێران رازی نەبووە لە سیاسەتەكانی، كازمی بەهۆی نزیكی لە ئەمەریكاوە دووچاری فشاری ئێران بووەتەوە كە تا هەڵبژاردنەكانی مانگی داهاتووی ئەمەریكا چارەنوسی كازمی و حكومەتەكەی یەكلایی دەبێتەوە". 

هەروەها وتیشی "لەئێستادا كازمی لە قەیرانێكی قوڵی ئابووری و سیاسیدایە كە تێپەڕاندنی ئەستەمە، چونكە لەلایەك؛ قەرزێكی زۆری بەسەردا كەوتووە و ناتوانێت مووچەی فەرمانبەران دابین بكات، لەلایەكی دیكەش؛ ئەمەریكا دەستی لێبەرداوە و ئێرانیش فشاری زۆری خستوەتە سەری".

هەرێمی كوردستانیش لەچوارچێوەی خاكی عیراقدا پریشكی ئەو قەیران و مەترسییەی بەركەوتووە و چەند رۆژی پێشوو بەكرداریش فڕۆكەخانەی هەولێر كرایە ئامانجی مووشەكی نادیار.

حەسەن بارام، رۆژنامەنوس و چاودێری سیاسی بە مەودا میدیای راگەیاند "پێویستە هەرێمی كوردستان بێلایەنی خۆی بپارێزێت و ناوماڵی خۆی رێكبخاتەوە و لەهەموو حاڵەتەكاندا چەند پلانێكی هەبێت بۆ رووبەرووبوونەوەی هەر مەترسییەك كە ئاماژەی خراپبێت بۆ سەر هەرێمی كوردستان". هەروەها وتیشی "پێناچێت ئەمەریكا باڵیۆزخانەكەی بكشێنێتەوە لە عیراق، چونكە لەلایەك؛ قورس دەوەستێت لەسەر ئیدارەكەی ترەمپ، لەلایەكی دیكەش؛ زۆر خراپ دەوەستێت لەسەر گەلانی عیراق، چونكە كۆمەڵێك سزای ئابووری بەدوایدا دێت و لەرێگەی ئاسمانیشەوە ئەمەریكا هێرش دەكاتە سەر میلیشیا چەكدارەكانی نزیك لە ئێران".

ئەو چاودێرە سیاسیە ئاماژەی بەوەشكرد "لەگەڵ هاتنە سەركاری مستەفا كازمی، پێشبینی دەكرا لەسەر دوو ئاست كاربكات، یەكەم؛ مامەڵەی توند بگرێتەبەر لەبەرانبەر حكومەتی قوڵ و سەركوتیان بكات، دووەم؛ بەنەخشە رێگایەك رووبەڕووی گەندەڵی و گەندەڵكاران ببێتەوە، بێگومان ئەوانەش گرژی و ئاڵۆزی درووست دەكات". هەروەها ئەوەشی وت "ئەمەریكا بەدیلی كازمی نیە لە عیراقدا، ئەگەر دەست لە كازمی بەردات، واتە دەستی لە عیراق بەرداوە، كەئەوەش بڕواپێكراو نیە و پێدەچێت پەیوەندییەكانی لەگەڵ كازمی بەپارێزراوی بهێڵێتەوە".