مەودا میدیا - کاروان نوری

به‌مه‌به‌ستی چاره‌سه‌ركردنی بابه‌تی شایستە داراییەکان، شاندێكی حكومه‌تی هه‌رێمی کوردستان سه‌ردانی بەغدا ده‌كات و سەرۆکی پەرلەمانی کوردستانیش ئاماژە بۆ ئەوە دەکات، چوونی شاندەکە بۆ چارەسەرکردنی کێشەکانە.
 
رێواس فایەق، سەرۆكی پەرلەمانی كوردستان بە مەودا میدیای راگەیاند "بۆ چارەسەرکردنی کێشەکانی نێوان هەولێر و بەغدا و بەتایبەتیش بابەتی شایستە داراییەکان، شاندێکی حکومەتی هەرێمی کوردستان دەچێتە بەغدا".
 
ناوبراو ئەوەشی خستەڕوو "چوونی شاندەکە بە مەبەستی گفتوگۆکردن لەسەر ناردنی 320 ملیار دینارەکەی بەغدا و ئەو پێشهاتەی کە هاتۆتە ئاراوە، بەڵام کات و ئەندامانی شاندەکە تا ئێستا ئاشکرا نەکراوە".

ئەمە لە کاتێکدایە، پەرلەمانی عیراق بەبێ رەزامەندی پەرلەمانتارانی کورد دەنگی لەسەر پرۆژەیاسای قەرزدا و پرۆژەیاساکەی پەسەندکرد، بەپێی ئەنجامی دانیشتنەکە حکومەتی عیراق بڕی ئەو نەوتە دیاری دەکات، کە ھەرێمی کوردستان دەبێت رادەستی بەغدای بکات، لە بەرانبەردا حکومەتی عیراقیش شایستە داراییەکانی هەرێمی کوردستان دەنێرێت.
    
 ک.ن