مەودا میدیا- سازگار ئەحمەد

سەرپەشتیاری گروپی شەقام رایدەگەیەنێت کێشەی خۆڵ و خاشاکی گەڕەکەکانی شاری کەرکوک چارەسەر نەکراوە، ئاماژەی بەوەشکرد هەوڵەکانیان بەردەوام دەبێت تاوەکو ئەو کیشەیە چارەسەر دەبێت و ئەو خۆڵ و خاشاکە لادەبرێت.

محەمەد جەلیل، سەرپەشتیاری گروپی شەقام لەبارەی زبڵ و خاشاک لە گەڕەکەکانی شاری کەرکوک بە مەودا میدیای راگەیاند "ئەو کێشەیە هێشتا چارەسەر نەبووە، بەڵام لەدوای ئەو فشار و هەوڵانەی لەلایەن گروپی شەقام و هاوڵاتییان و رۆژنامەنوسانی کەرکوک ئەنجامدرا بەرپرسان خەمیان لە بابەتەکە خواردووە و بۆ دووەمجار چوونەوە بەغدا".

ئاماژەی بەوەشکرد "هەندێک هەڵمەتی پاککردنەوە هەیە لە شەقامەکان، بەڵام تاوەکو ئێستا خۆڵ و خاشاکی گەڕەکەکان لانەبراوە، بۆیە دەبێت پلانێکی ستراتیژی هەبێت لە رێی کۆمپانیایەکی باشەوە کێشەکە چارەسەر بکرێت".

سەرپەشتیاری گروپی شەقام ئەوەشی خستەڕوو "هەندێک لەو گەڕەکانەی کە دەکەونە لای شوێنە دیارەکان بۆ نمونە لای پارێزگار و چەند شوێنێکی دیکە خۆڵ و خاشاکەکەی لابراوە، بەڵام گەڕەکەکانی دیکە هیچ پاک نین".

هەروەها ئاماژەی بەوەشدا "رۆژی شەممە کاتژمێر 11:00 پێشنیوەڕۆ جارێکی دیکە گروپی شەقام گردبوونەوە ئەنجام دەدەین بۆ ئەو مەبەستە و هەوڵەکانمان بەردەوام دەبێت تاوەکو کێشەکە چارەسەر دەبێت".

س.س