کوردستانی

وەزارەتی پەروەردە لەبارەی دەستپێکردنەوەی پرۆسەی خوێندن راگەیەندراوێکی بڵاوکردەوە

مەودا میدیا - سلێمانی |


وەزارەتی پەروەردە لەبارەی دەستپێکردنەوەی پرۆسەی خوێندن راگەیەندراوێکی بڵاوکردەوە
مەودا میدیا-

پاش کۆبوونەوەی ئەمڕۆ چوارشەممە 13ی کانونی دووەمی 2021 لیژنەی باڵای رووبەرووبونەوەی ڤایرۆسی کۆرۆنا، بە سەرپەرشتی وەزیری ناوخۆ و ئامادەبوونی وەزیرانی تایبەتمەند و پارێزگار و سەرپەرشتیاری ئیدارە سەربەخۆکان، بریاردرا:

1- رۆژی شەممە 16ی 1ی 2021 خوێندن لە قۆناغی 12ی ئامادەیی، بە هەموو بەشەکانییەوە لە قوتابخانە و خوێندنگە حکومی و ناحکومییەکان دەستپێدەکاتەوە. 

2- پڕۆگرامی خوێندن بە ریزبەندی دەخوێندرێت رۆژ و کاتی تاقیکردنەوەکانی وەرزی و تاقیکردنەوە گشتییەکان بە گوێرەی ئەو خشتانەی کە بە نوسراوی فەرمی بڵاودەکرێنەوە کاریان پێدەکرێت. 

3- لەسەر راسپاردەی وەزارەتی تەندروستی و بەمەبەستی خۆپارێزیی مامۆستایانی بەرێز تەنیا ئەوکاتانە لە قوتابخانە دەبن کە وانەیان هەیە، پاش وتنەوەی وانەکانیان پابەند ناکرێن بە مانەوە لە ناو قوتابخانە.

4- لە رۆژی شەممە 16ی 1 تا ماوەی یەک هەفتە، ئەو بژارەیە دەخرێتە بەردەم بەخێوکاری قوتابیان و خوێندکاران لە رێگەی فۆرمێکەوە کە وەزارەتی پەروەردە ئامادەی کردووە  و لە قوتابخانەکان پڕ دەکرێتەوە، کە بەخێوکار سەرپشک دەکات قوتابییەی لە ناو پۆل بخوێنێت یان دەتوانێت خوێندنی ئەلیکترۆنی و ئۆنلاین و پاڵپشتی ماڵەوەی بۆ دابینبکات و نەچێتەوە بۆ قوتابخانە، بەڵام تەواوی تاقیکردنەوە نووسینییەکان لە ناو پۆل دەبێت ئەنجام بدات. 

5- رێنماییە خۆپارێزییەکان لە ناوەندەکانی خوێندن جێبەجێدەکرێت و پێگیریی بە رێنماییەکان زامنکاری بەردەوامبوونی خوێندنە، بۆ ئەو مەبەستە ژووری ئۆپەراسیۆنی پارێزگا و ئیدارە سەربەخۆکان بۆ بابەتی پرۆسەی خوێندن، کە بە سەرپەرشتی بەرێز پارێزگار یان سەرپەرشتیاری ئیدارە و بەرێوەبەرانی گشتی پەروەردە و تەندروستی پارێزگا و ئیدارە سەربەخۆکان پێکهاتووە، هەماهەنگی دەکەن بۆ باش بەرێوەچوونی پرۆسەکە.

6- لە رووی پرەنسیپەوە، کۆبوونەوە پلانی وەزارەتی پەروەردەی پەسەند کرد بۆ دەستپێکی خوێندنی قۆناغەکانی 1ی بنەڕەتی تا 11ی ئامادەیی  وپەیمانگەکان, حکومی و ناحکومی کە لە 1ی 3ی 2021  دەستپێبکات, لە 2ی 2ی 2021 لیژنەی باڵا کۆدەبێتەوە بۆ هەڵسەنگاندنی رەوشی تەندروستی و هەر بڕیارێکی نوێ کە پێویست بێت بۆ گۆڕانکاری لەو بەروارە (بۆ قۆناغەکانی 1ی بنەڕەتی تا 11ی ئامادەیی) بەگوێرەی بڵاوبوونەوە و کەمبونەوەی ڤایرۆسی کۆرۆنا, پاشان وەزارەت پلانی پەسەندکراو بە نووسراوی فەرمی گشتاندنی پێدەکات. 

س.س