مەودا میدیا-

ئەندامێکی ئەنجومەنی باڵای سیاسی و بەرژەوەندیی یەکێتیی نیشتمانیی کوردستان رایگەیاند دۆخی سیاسیی کوردستان تەپیوە و جەخت دەکاتەوە کە بە تکا و پاڕانەوە حزبەکان سیاسەتی خۆیان ناگۆڕن.

مەلا بەختیار، ئەندامی ئەنجومەنی باڵای سیاسی و بەرژەوەندیی یەکێتیی نیشتمانیی کوردستان، لە میانی کۆبوونەوەی لەگەڵ دەستەی دەستپێشخەری کۆنفرانسی نیشتمانیی، رایگەیاند "واز لە سیاسەتی پینەوپەڕۆ و تكا و پاڕانەوە لە حزبەكان بهێنن، چونكە ئەم حزبانە بێ جیاوازی، بە تكا و پاڕانەوە نەهج و سیاسەتی خۆیان ناگۆڕن".

ناوبراو ئاماژەی بەوەشکردووە "تەنانەت ئەوەی وایكرد بڕیار لە هەڵبژاردنی پێشوەختە بدرێت لە عیراقدا  تكا و  پاڕانەوە نەبوو لە حزبە شیعە و سوننەكان، بەڵكو شەقامی راپەڕیوی بەغدا و ناسرییە و بەسرە و شارەكانی دیكە بوون". 

مەلا بەختیار لەبارەی دۆخی کوردستان و سیاسەتی حزبە کوردییەکان، وتویەتی "بەداخەوە باری ئابووری تەپیوە، سیستمی حوكمڕانی لە ئاستی قۆناغەكە و سەردەمەكە نییە، دەستوورمان نییە، مەسەلەی گەندەڵی چووەتە ناو ئەقڵی هەموو تاكێكەوە".

ب.م