مەودا میدیا-

خانمە چالاکوانێکی کوردی رۆژهەڵات، دوای ئەوەی لەلایەن ئیتڵاعاتی ئێرانەوە هەراسان دەکرێت و ناچار دەکرێت بەرەو تورکیا هەڵبێت، لە تورکیاش دراوەتە دادگا و سزای بەسەردا سەپێنراوە.

تۆڕی مافەکانی مرۆڤی کوردستان بڵاویکردەوە کە دادگای ئیستەنبوڵ، فەرزانە جەلالی بانگکردووە و لێپێچینەوەی لەگەڵ کردووە بە تۆمەتی ئەوەی "لە تۆڕە کۆمەڵایەتییەکان پشتیوانی تیرۆری کردووە".

دادگای ئەستەنبوڵ دەستی بە لێکۆڵینەوە لەگەڵ ناوبراو کردووە و چوونە دەرەوەی ئەستەنبوڵی لە فەرزانە قەدەغەکردووە.

تۆڕی مافەکانی مرۆڤی کوردستان لە زاری فەرزانە جەلیلیەوە بڵاویکردووەتەوە "کەسێکی نەناسراو پۆلیسی لەوە ئاگادارکردووە کە گوایا من رۆژنامەنوسم و کار بۆ دەزگاکانی حزبە کوردییەکان دەکەم دژی تورکیا، لە کاتێکدا وانییە و من تەنها هەندێک هەواڵم لایک کردووە یان شەیر کردووە".  

فەرزانە چالاکوانێکی رۆژهەڵاتە و پێشتر چەند جارێک لەلایەن ئیتڵاعاتی ئێرانەوە بانگکرابوو و هەراسان کرابوو، ئەویش ئێرانی بەرەو تورکیا بەجێهێشتووە، بەڵام لەکاتی سەردانی کونسوڵخانەی ئێران لە ئەستەنبوڵ، پاسپۆرتەکەی لێ وەرگیراوەتەوە.

 ب.م