مەودا میدیا- سازگار ئەحمەد

وتەبێژی سەندیکای زەڕەنگەرانی هەولێر رایدەگەیەنێت ماوەی 10 رۆژ دەبێت نرخی زێڕ لە 380 هەزار دیناری عیراقیدا جێگیربووە، ئاماژەی بەوەکرد لە داهاتوودا نرخی زێڕ زیاتر بەرز دەبێتەوە.

هەندرێن عەبدولڕەحمان، وتەبێژی سەندیکای زەڕەنگەرانی هەولێر بە مەودا میدیای راگەیاند "ماوەی 10 رۆژ دەبێت نرخی زێڕ لە 380 هەزار دیناری عیراقیدا جێگیربووە، ئەویش پەیوەندیی بە جێگیربوونی بەهای دۆلارەوە هەیە".

ئاماژەی بەوەشکرد "لەم ماوەیەدا هیچ گۆڕانکارییەکی بەرچاو رووینەداوە لە نرخی زێڕدا"، ئەوەشی خستەڕوو "نرخی زێڕ بەم جۆرە نامێنێتەوە لە داهاتوودا بەپێی ئەو پێشهاتانەی دێنە پیش گۆڕانی بەسەردا دێت، پێشبینیش دەکرێت لە داهاتوودا نرخی زێڕ زیاتر بەرزبێتەوە".

ئەمەش لەکاتێکدایە، بڵاوبوونەوەی ڤایرۆسی کۆرۆنا و بەرزبوونەوەی بەهای دۆلار کاریگەری لەسەر بازاڕی زێڕ دروستکردووە، بوونەتە هۆکار بۆ بەرزبوونەوەی نرخی زێڕ.

س.س