مەودا میدیا-

پاش ئەوەی کاسبکارانی عەلوەی سلێمانی دەرگای عەلوەکەیان داخست و خۆپیشاندانیان کرد بەهۆی ئەوەی مۆڵەت بە ساردکەرەوەیەک دراوەو خاوەنی پرۆژەکەش لە جیاتی ساردکەرەوە دەیەوێت عەلوە دروستبکات، ئەندامێکی پەرلەمانی کوردستان ئاشکرایدەکات، فێڵ لە کاسبکارانی عەلوەی سلێمانی و پەرلەمانتارانیش کراوە.

دابان محەمەد، ئەندامی فراکسیۆنی گۆڕان لە پەرلەمانی کوردستان، لە لاپەڕەی تایبەتی خۆی لە تۆڕی کۆمەڵایەتیی فەیسبوک رایگەیاند "‎لە ماوەی رابردوودا ئەو کەسانەی کاریان لە عەلوەی سلێمانی دەکرد، ناڕەزاییان دەربڕی و  خۆپیشاندانیانکرد، کە گەنجینەیەکی ساردکەرەوە بە نیازە عەلوەی دووەم دروست بکات، نیەت و کارەکانی لە پرۆژەکەدا بۆ عەلوەیە نەک ساردکەرەوە".

راشیگەیاند "‎لەسەر داوای کاسبکارانی عەلوەی سلێمانی، بەدواداچونمانکرد و بەڕێوەبەری گشتیی وەبەرھێنانی سلێمانیمان بانگھێشت کرد، پێی راگەیاندین ئەو پرۆژەیە ساردکەرەوەیە و دەستەی وەبەرھێنان مۆڵەتی عەلوەی نەداوە و نادات بەوەش کێشەکە چارەسەربوو".

دابان محەمەد، ئاشکراشیکرد "‎لەئێستادا بەپێی فەرمانێکی کارگێڕی بەڕێوەبەری وەبەرھێنانی سلێمانی لە 18ی نیسانی 2021، بەبێ گەڕانەوە بۆ دەستەی وەبەرھێنان،  ناوی گەنجینەی ساردكەرەوەوەی سەوزە و میوە بۆ عەلوەی سەوزە و میوەی هوانە گۆڕدراوە، ئەمەش فێڵ و ناڕاستییە لەگەڵ پەرلەمانی کوردستان و کاسبکارانی عەلوەی سلێمانی". 

جەختیشیکردەوە "‎کاسبکاران سکاڵای یاساییان کردووە، پشتیوانیان دەبین، وەک لیژنەی وەبەرھێنانیش بەدواداچون بۆ کۆتا نوسراوی وەبەرھێنانی سلێمانی دەکەین، ھەروەھا ناڕاستی وتەکانی وەبەرھێنانی سلێمانی لەبەردەم پەرلەمانتاران لە نوسینگەی سلێمانی".

ه.ع