مەودا میدیا-

وەزارەتی دەرەوەی توركیا باڵیۆزی سویدی بانگهێشتكرد بەهۆی پشتیوانيكردنی ئەو وڵاتە لە دۆزی كورد و پارتی یەكێتیی دیموكراتیك "پەیەدە" لە رۆژئاوای كوردستان.

رۆژی دووشەممە 20ی نیسانی 2021 لە رێگەی ڤیدیۆ كۆنفرانسەوە وەزیری بەرگریی سوید لەگەڵ مەزڵوم عەبدی، فەرماندەی هێزەكانی سوریای دیموكرات "هەسەدە" و بەڕێوەبەرایەتیی خۆسەر لە رۆژئاوای كوردستان كۆبووەوە و تیایدا چەندین پرسی جێگە بایەخی نێوان هەردوولا تاوتوێ كران.

وەزارەتی دەرەوەی توركیا بەرانبەر ئەو كۆبوونەوەیە هەڵوێستی توندی وەرگرت و لە یەكەم هەنگاویدا باڵیۆزی سویدی لە ئەنقەرە بانگهێشتكرد و رایگەیاند "ئەو كۆبوونەوەیە بێزاری كردوون".

بەپێی ماڵپەڕی زەمانی توركی وەزارەتی دەرەوەی توركیا داوای لە باڵیۆزی سوید لە ئەنقەرە كردووە "پتشیوانییەكانتان بۆ هێزە كوردییەكان بووەستێنن و پێكەوە كاربكەین بۆ یەكێتیی خاكی سوریا و بەدیهێنانی سەقامگیریی هەمیشەیی تیایدا".

جێگەی ئاماژەیە سوید یەكێكە لەو وڵاتانەی گرنگی زۆر بە دۆزی كورد دەدات و لە رێگەی كەناڵە دیپلۆماسی و فەرهەنگییەكانەوە بەردەوامە لە هاوكاریكردنی بەڕێوەبەرایەتیی خۆسەر لە رۆژئاوای كوردستان.

س.س