مەودا میدیا-

بزووتنەوەی تاڵیبان داوای کشانەوەی هێزەکانی توركیا لەسەر خاکی وڵاتەکەیان دەكات و رایگەیاند، مانەوەی هەر هێزێک لە وڵاتەکەیان بە پێشێلکردنی سەروەریی خاک و بە دژی بەرژەوەندیی نیشتمانی دادەنرێت.
 
دوای ئەوەی هێزەکانی ئەمەریکا لە ئەفغانستان کشانەوە بزووتنەوەی تاڵیبان زۆربەی خاکی وڵاتەکەی کۆنترۆڵکردەوە و داوا لەو هێزە بیانییانەی دیکەش دەکەن کە خاکی وڵاتەکەیان جێبهێڵن و لە راگەیەندراوێکدا داوایان لە تورکیا کرد هێزەکانیان لە ئەفغانستان بکشێننەوە.

لە راگەیەندراوەکەی تاڵیباندا ئەوەش هاتووە "مانەوەی ئەو هێزەی تورکیا بڕیارێکی نەخوازراوە، دوای ئەوەی ئەنقەرە لەگەڵ واشنتۆن رێککەوت لەسەر پاراستنی فڕۆکەخانەی کابوڵ، دوای کشانەوەی هێزە بیانییەکان لە ئەفغانستان".

ئاماژەیان بۆ ئەوەشکردووە، مانەوەی هەر هێزێکی دەرەکی لەسەر خاکی وڵاتەکەیان لە ژێر هەر ناوێکدا بە داگیرکاری دادەنرێت.

ئەوە لە کاتێکدایە دوای کشانەوەی هێزەکانی ئەمەریکا لە ئەفغانستان رۆژی هەینی رابردوو، رەجەب تەیب ئەردۆغان سەرۆک کۆماری تورکیا رایگەیاند، لەگەڵ ئەمەریکا رێکەوتوون بۆ دابینکردنی ئاسایش و چۆنێتی پاراستنی فڕۆکەخانەی کابول.

ر.ر