مەودا میدیا-

هاوردەکردنی تەماتە لە ناوەڕاست و خواروی عیراقەوە بۆ هەرێمی کوردستان بە بڕیاری وەزارەتی کشتوکاڵی هەرێمی کوردستان قەدەغە دەکرێت.

ئەمڕۆ سێشەممە 14ی ئەیلولی 2021 وەزارەتی کشتوکاڵ و سەرچاوە ئاوییەکانی هەرێمی کوردستان بڕیارێکی دەرکرد و ئاماژەی بەوەکرد "لە پێناو بە بازاڕکردنی بەرهەمی تەماتەی جوتیارانی هەرێم، بڕیاری قەدەغەکردنی هاوردەکردنی تەماتە لە پارێزگاکانی باشور و ناوەڕاستی عیراقەوە دراوە، بەتایبەتیش کە ئێستا وەرزی پێگەیشتنی تەماتەی دەشتی پێنجوێنە".

باسی لەوەشكردووە، نووسراوێکی فەرمی ئاراستەی ئیدارەی گەرمیان کراوە و تیایدا داوایان لێدەکات کە بازگەکانیان ئاگاداربکرێنەوە بۆ ئەوەی بەهیچ شێوەیەک رێگە نەرێت تەماتە لە ناوەڕاست و باشوری عیراق هاوردەی هەرێم بکرێت.

لە راگەیەندراوەکەدا ئەوەش خراوەتەڕوو، لە ئێستادا وەرزی پێگەیشتنی تەماتەی خۆماڵییە بە تایبەتی تەماتەی پێنجوێن، کە دەتوانرێت پێداویستی ناوخۆ دابین بکات.

ر. ر