مەودا میدیا-

فڕۆکەخانەى نێودەوڵەتى سلێمانى دەستگیرکردنی گروپێکی ساختەکاری راگەیاند کە بە نیازبوون بە بەڵگەنامەی ساختەوە بچنە دەرەوەی وڵات.
 
لە راگەیەندراوێکدا فڕۆکەخانەى نێودەوڵەتى سلێمانى رایگەیاند "لە چوارچێوەى جێبەجێکردنی کاروباری فڕۆکەخانە و کۆنتڕۆڵکردنی ‏سەفەری گەشتیاران بۆ دەرەوەی وڵات بنکەی نشینگەى فڕۆکەخانە بەھۆی شارەزایی و لێھاتوویی ئەفسەر و کارمەندەکانیان و بە هاوکارى ئاسایشی فڕۆکەخانە دوێنێ دووشەممە 5ی تشرینی یەکەمی 2021 لە گەشتى سلێمانی- دۆسڵدۆف توانیان ڕێگرى بکەن لە ‏هەوڵێکى ساختەکارى گروپێکى گەشتیاران".

ئاماژە بەوەشکراوە "گروپەکە ژمارەیان 24 گەشتیار بووە و بە ‏نیازبوون گەشتى دەرەوەى وڵات بکەن، بەڵام دوای وردبینی لە دۆکیۆمێنت ‏و بەڵگەکانیان دەرکەوت هەڵگرى جۆرێک لە دۆکیۆمێنتن کە هیچ بەڵگەیەکى ‏فەرمی نەبووە بۆ سەفەرکردن بۆ دەرەوەى وڵات".

باس لەوەشکراوە "گروپەکە گواستراونەتەوە ‏بۆ بنکەى پۆلیسى فڕۆکەخانە و لە ئێستادا لە قۆناغی لێکۆڵینەوەدان و ‏چاوەڕوانی بڕیاری کۆتایی لای دادگا دەبێت".

س،ر