مەودا میدیا-

خانەی راگەیاندنی ئەمنی عیراق ئاشکرایکرد لە پارێزگا جیاجیاکان بەهۆی پێشلکاریی لە پرۆسەی دەنگداندا 77 کەس دەستگیرکراون کە پارێزگاکانی کەرکوک و هەولێریشی تێدایە.

ئەمڕۆ یەکشەممە 10ی تشرینی یەکەمی 2021 لە راگەیەندراوێکدا خانەی راگەیاندنی ئەمنی عیراق رایگەیاند "لیژنەی باڵای ئەمنی بۆ هەڵبژاردنەکان 77 کەسیان بە تۆمەتی پابەندنەبوونیان بە یاساکانی پرۆسەی هەڵبژاردن لە پارێزگاکانی بەغدا، نەینەوا، دیالە، کەرکوک، بەسرە، ئەنبار، سەلاحەدین، هەولێر، واسیت و دیوانییە دەستگیرکرد".

ئاماژەی بەوەشکرد "ئەم ڕێوشوێنانە بەشێکن لە مسۆگەرکردنی نەزاهەی هەڵبژاردنەکان و دڵنیابوون لەوەی کە کەشوهەوای هەڵبژاردنێکی شەفاف و دیموکراتی کە لە ئازادی دەنگدەران دروست دەبێت بۆ ئەوەی ئەو کەسەی نوێنەرایەتی دەکات هەڵبژێرێت، هەروەها ئەم کەسانە دەدرێنە لیژنە دادوەرییەکان کە لەلایەن ئەنجومەنی باڵای دادوەرییەوە دانراون".

جێگای ئاماژەیە، بەیانی ئەمڕۆ 10ی تشرینی یەکەمی 2021 پرۆسەی دەنگدانی گشتی لە پارێزگاکانی هەریمی کوردستان و عیراق دەستیپێکرد و هاوڵاتییان روویان لە سندوقەکانی دەنگدان کرد.

س.ر