مەودا میدیا-

بافڵ جەلال تاڵەبانی، هاوسەرۆکی یەکێتیی نیشتمانیی کوردستان لە دەباشان پێشوازیکرد لە دکتۆر مەھدی سەفەری، یاریدەدەری وەزیری دەرەوەی کۆماری ئیسلامی ئێران بۆ کاروباری دبلۆماسی و بازرگانی و مەھدی شوشتەری، سەرکونسوڵی کۆماری ئیسلامیی ئێران لە شاری سلێمانی.

لە دیدارێکدا تەئکید لە فراوانکردنی ھاریکاری ئابووری و بازرگانی لە نێوان ھەردوولا کرایەوە بە جۆرێک خزمەت بە بەرژەوەندیی گشتی بکات و پێویستی لێکتێگەیشتن و چارەسەرکردنی کێشە و ئاستەنگەکانی بەردەم ئاڵوگۆڕی بازرگانی و کارئاسانی زیاتر بۆ بازرگانان و سەرمایەداران دووپاتکرایەوە.

ھەر لە دیدارەکەدا گفتوگۆی ورد کرا لەسەر رێوشوێنەکانی پەرەپێدانی کاری وەبەرھێنان و جێبەجێکردنی پرۆژەی ستراتیژی لە ھەرێم و کارئاسانی زیاتر بۆ خاوەنکار و سەرمایەدارانی کۆماری ئیسلامی ئێران تا لە ھەرێم سەرمایەگوزاری زیاتر بکەن و بەشداری کاریگەرتربن لە پێشخستنی ئابووری ھەرێم، ھەردوولا ھاوڕابوون لەسەر ھەماھەنگی و بەردەوامی پەیوەندییەکان.

بافڵ جەلال تاڵەبانی پەرۆشی و پشتیوانی یەکێتیی نیشتمانیی کوردستانی بۆ زیاترکردنی ئاستی ئاڵوگۆڕی بارزگانی لە نێوان ھەرێمی کوردستان و کۆماری ئیسلامیی ئێران بۆ وەفدی میوان دەربڕی و رایگەیاند "کارئاسانی تەواو دەکەین بۆ ھەموو جموجۆڵێکی بازرگانی، ئەو پەیوەندییە ئابوورییەی ھەبووە دەمانەوێت نەک بەردەوامی بەڵکو زیاتری بکەین و ھاوکارمان بن بۆ جێبەجێکردنی چەندین پرۆژەی ستراتیژی و گرنگ کە خزمەتی زیاتر بە ھەرێم بکات لەو رووەشەوە پاڵپشتی یەکێتی دەربڕی بۆ تەواوکردنی رێوشوێنە یاساییەکانی  بە رەسمی ناساندنی مەرزەکانی کێلی، شوشمێ و پشتە کە خزمەتێکی بەرچاو بە ھەرێم دەکات و ھەزاران ھەلی کار لە سنوورەکە دەڕەخسێنێت و کاریگەری دەبێت لە پێشخستنی ئابووری ھەرێم".

س.ر