مەودا میدیا-

لە ئاگاداری نامەیەکدا بەڕێوەبەرایەتیی پاسپۆرتی سلێمانی رایگەیاند، بۆ دوورخستنەوەی هاوڵاتییان لە رێگەی قاچاخ و نایاسایی، بەڕێوەبەرایەتیی پاسپۆرتی سلێمانی هەڵمەتێكی هاوكاری و رێنیشاندان دەربارەی رێگە یاساییەكانی كۆچ بۆ وڵاتانی ئەوروپا رادەگەیەنێت.

ئەمڕۆ چوارشەممە بەڕێوەبەرایەتیی پاسپۆرتی سلێمانی لە ئاگادارییەكدا رایگەیاند "لەڕێگەی هەڵمەتێکی میدیاییەوە هاوکار و رێنیشاندەری هاوڵاتییانی خۆشەویست دەبین، بۆئەوەی بەڕێگەیەکی یاسایی کۆچ بۆ وڵاتانی ئەوروپا بکەن، نەک رێگەی مەرگەسات و قاچاخ و نایاسایی بگرنەبەر".

پاسپۆرتی سلێمانی ئاماژەی بەوەشکردووە، لەڕێگەی پەڕەی تایبەتیی خۆی لە تۆڕی کۆمەڵایەتیی فەیسبووک، رێگە یاساییەکانی وەرگرتنی ڤیزای گەشتیاری، ڤیزای کارکردن، ڤیزای نەخۆشی و چەند جۆرێکی دیکە لە ڤیزا بڵاودەکاتەوە.

سەبارەت بە ئامانجی ئەو هەڵمەتە دەڵێت " بۆ ئەوەیە هاوڵاتییان بەڕێگایەکی سەلامەت و یاسایی کۆچبکەن، بۆئەوەی خۆیان و خێزانەکانیان دووربن لە مەترسییەکانی رێگەی کۆچی نایاسایی، داواش لەهەر كەسێك دەكات كە دیمەنەكانی ژن و منداڵ و گەنج و پیرەکانی رێگەی کۆچ ناخی هەژاندوون، هاوکاربن بۆ ئەوەی چیتر هاوڵاتییانی کورد لەو رێگەیە نەبنە قوربانی و رێگری لەو نەهامەتییە بکەین".

ر. ب