مەودا میدیا-
 
سەرۆكی یەكێتیی پیاوانی كوردستان لە رۆژی جیهانیی پیاواندا رایگەیاند، لە 10 مانگی یەکەمی ئەمساڵدا 463 پیاو لە هەرێمی کوردستان توندوتیژییان بەرانبەر کراوە و شەش پیاویش کوژراون.

ئەمڕۆ هەینی 19ی تشرینی دووەمی 2021 بورهان عەلی، سەرۆكی یەكێتیی پیاوانی كوردستان لە رۆژی جیهانی پیاواندا بە مەودا میدیای راگەیاند "پەیامم بۆ ئافرەتان و پیاوان ئەوەیە کە هەوڵبدەن بە لێکتێگەیشتن کێشەکانیان چارەسەربکەن، چونکە خێزان بنەمای کۆمەڵگەیە و خێزانی دروست و ئەوەی لە ئاشتیدا دەژی و سەقامگیرە کۆمەڵگەیەکی تەندروست دروستدەکات، بۆیە گرنگە ژنان دۆخی پیاوان و ئەرکی قورسیان رەچاوبکەن و هەوڵبدەن باری سەرشانی پیاوان سووک بکەن و هاوکاریان بن".

 

ئەوەشی خستەڕوو "بەپێی ئامارەکان کە لە لق و نووسینگەکانمانەوە بەدەستمان گەیشتووە، لە 10 مانگی یەکەمی ساڵی 2021دا ژمارەی ئەو پیاوانەی توندوتیژییان بەرانبەرکراوە  463 بووە، هەروەها شەش پیاو لەو ماوەیەدا لە لایەن ژنانەوە کوژراون"، سەبارەت بە هۆکاری توندوتیژییەکان دژی پیاوان وتی " هۆکاری توندوتیژییەکان زۆرن، لەوانە کێشەی دارایی، لاوازی دەسەڵاتی دادگە و دادوەری، زاڵبوونی بیرکردنەوەی خێڵەکی و نەبوونی لێکتێگەشتین لە نێو خێزانەکان".

 

ئەوە لە کاتێکدایە رۆژی 19ی تشرینی دووەم بە رۆژی جیهانیی پیاوان وەکو رێزلێنانێک بۆ رۆڵی پیاو لە کۆمەڵگە دەستنیشانکراوە، ئەو رۆژە یەکەمجار لە ساڵی 1999 دیاریکرا کاتێک لە ترێنداد و تۆباگۆ ئەم رۆژە دیاریکرا و دواتر پەڕیەوە بۆ ئوسترالیا، ئەمەریکا، کەنەدا، روسیا، ئیتاڵیا و چەندین وڵاتی دیکە و ئێستا 85 وڵات بە فەرمی ئەو یادە دەكەنەوە.

ر. ب