مەودا میدیا-

وەزارەتی پێشمەرگەی حکومەتی هەرێمی کوردستان لە راگەیەندراوێکدا وەڵامی وەزیری بەرگریی تورکیا دەداتەوە کە لە چەند رۆژی رابردوودا رایگەیاندبوو ھیچ جوگرافیایەک نییە بە ناوی کوردستانەوە.

لە راگەیەندراوەکەدا وەزارەتی پێشمەرگەی حکومەتی هەرێمی کوردستان رایگەیاند "وتەكانی خلوسی ئاكار، وەزیری بەرگریی توركیا لەبەر ئینكاركردنی كوردستان جێگەی سەرسوڕمانە، بۆ ئێمە جێگەی پرسیارە كەسێك لە پێگەیەكی فەرمیی دەوڵەتدا رێگە بە خۆی بدات ئینكاری واقیعێكی مێژوویی و دیموگرافی و جوگرافی بكات كە لە راستیدا خۆشی قەناعەتی پێی نییە".

ئاماژە بەوەشکراوە "وەزیرى بەرگرىی تورکیا خۆی سەردانی هەرێمی كوردستانی كردووە و پێمان ناڵێ ئەو شوێنەی سەردانی كردووە كوێیە و ناوی چییە؟، ئەگەر ئەم بەڕێزە لە بوونی جوگرافیای كوردستان هەر گومانی هەیە با ئاوڕێك لە بەڵگەنامە و مێژووی عوسمانییەكان بداتەوە ئینجا بۆی دەردەكەوێت كوردستان هەیە یان نییە".

لە راگەیەندراوەکەدا ئەوەش هاتووە "عەقلییەتی ئینكاركردنی میللەتێك و جیۆگرافیاكەی هەمیشە سەرچاوەی كێشە و گیروگرفت بووە و بە هیچ ئەنجامێك ناگات".

س،ر