مەودا میدیا-

وەزارەتی کارەبای حکومەتی هەرێمی کوردستان گرنگترین کار و پلانەکانی وەزارەتەکەی بۆ وەرزی زستان بڵاوکردەوە و رایدەگەیەنێت تەواويی بەڕێوەبەرایەتییە گشتییەکانی کارەبا و وێستگەکانی بەرهەمهێنانی كارەبا پابەندی بڕیارەکانی کۆنترۆڵی ناوەندی وەزارەت دەبن.

لە راگەیەندراوەکەی وەزارەتی کارەبای حکومەتی هەرێمی کوردستان هاتووە "وەزارەتی کارەبا کار و پلانەکانی بۆ باشترکردنی دۆخی کارەبا لە وەرزی زستان خستەڕوو".

لە کۆبوونەوەی ئەنجومەنی وەزارەت بە سەرپەرشتی کەمال محەمەد ساڵح، وەزیری کارەبای هەرێم ئەم بڕیارانەی خوارەوە دران:

 - تەواويی بەڕێوەبەرایەتییە گشتییەکانی کارەبا و وێستگەکانی بەرهەمهێنانی كارەبا پابەندی بڕیارەکانی کۆنترۆڵی ناوەندی وەزارەت دەبن.

-  ئامادەکاریی بۆ دابینکردنی پێداویستییەکانی دابەشکردنی کارەبا بۆ وەرزی زستان لە مانگەکانی (2,1,12) دەکرێت.

- ڕاپۆرتی (داهاتی کارەبای شارەکان و سەرپێچییەکان) ئامادە دەکرێت.

-هەڵمەتی نەهێشتنی سەرپێچی بەردەوام دەبێت و ڕێکاریی یاسایی بەرانبەر سەرپێچیکاران دەگیرێتە بەر.

- بە کەمکردنەوەی رۆتین و دابینکردنی پێداویستییەکانی، پڕۆژەی پێوەری زیرەک خێراتر دەکرێت و ژمارەیەکی زیاتر دەبەسترێت.

- لیژنەکانی پێوەری زیرەک لە پارێزگاکان بە هەماهەنگی لەگەڵ لیژنەی ناوەندی پێوەری زیرەک، کێشەی دانانی پێوەری زیرەک بۆ ئەو هابەشانەی کارەبا چارەسەر دەکەن کە ستوونی کارەبایان نییە.

س،ر