مەودا میدیا-

وەزارەتی دارایی و ئابووری حکومەتی هەرێمی کوردستان روونکردنەوەیەکی لەبارەی دەرماڵەی خوێندکارانی زانکۆ و پەیمانگەکان بڵاوکردەوە و رایدەگەیەنێت لە ئەمساڵدا هیچ نووسراوێكی فەرمی وەزارەتی خوێندنی باڵا و توێژینه‌وه‌ی زانستی لە رێگەی  ئەنجومەنی وەزیرانەوە نەهاتووە بۆیان سەبارەت بەو پرسە.

لە روونکردنەوەکەی وەزارەتی دارایی و ئابووریی حکومەتی هەرێمی کوردستان هاتووە "بە بڕیاری ئەنجومەنی وەزیران ژمارە (1018) لە بەرواری 11/2/2014 بەهۆی قەیرانی داراییەوە خەرجكردنی دەرماڵەی خوێندكاران راگیراوە".

ئاماژە بەوەشکراوە "پێش 2014 دوای په‌سه‌ندكردنی بودجه‌ له‌ په‌رله‌مانه‌وه‌ تخصيصات بۆ دەرماڵەی خوێندكاران دانراوه‌ و هه‌ر لە وەزارەتی خوێندنی باڵاوه‌ خه‌رجكراوه‌و به‌ هیچ جۆرێك نه‌هاتۆته‌وه‌ بۆ وه‌زاره‌تی دارایی و په‌یوه‌ندی به‌ داراییه‌وه‌ نییه‌".

وەزارەتی دارایی دەشڵێت "هیچ نووسراوێكی فەرمی وەزارەتی خوێندنی باڵا و توێژینه‌وه‌ی زانستی لە ڕێگای  ئەنجومەنی وەزیرانەوە له‌ ساڵی 2021 نەھاتووە بۆ وەزارەتی دارایی تایبەت بە دەرماڵەی خوێندكاران".

س،ر