مەودا میدیا-

فه‌رمانگه‌ی میدیا و زانیاریی حكومه‌تی هه‌رێمی كوردستان رایگەیاند، بڕیاردراوە کە 11 هەزار و 141 پارچە زەوی بەسەر کەسوکاری شەهیدان، ئەنفالکراوان، جینۆساید، زیندانیانی سیاسی و رزگاربووانی شاڵاوی ئه‌نفال له‌ سنووری پارێزگا و ئیداره‌ سه‌ربه‌خۆكان له‌ هه‌رێمی كوردستان دابەشبکرێت.

 

ئەمڕۆ سێشەممە 23ی تشرینی دووەمی2021  فه‌رمانگه‌ی میدیا و زانیاریی حكومه‌تی هه‌رێمی كوردستان لە راگەیەندراوێکدا ئاماژەی بەوەکرد "لەسەر راسپاردەی مەسرور بارزانی، سەرۆک وەزیرانی هەرێمی کوردستان بڕیاردراوە زەوی بۆ 11 هەزار و 141 کەس تەرخان بکرێت".

 

ئەوەش خراوەتەڕوو "دوای وردبینیی ته‌واوی ناوه‌كان و دڵنیابوون له‌ بوونی مه‌رجه‌كانی ته‌رخانكردنی زه‌وی تیایاندا زەوییەکان دابەشدەکرێن، وردبینییەکەش له‌ رێگه‌ی لیژنه‌یه‌كی پسپۆره‌وه‌ ده‌بێت كه‌ بۆ ئه‌و مه‌به‌سته‌ پێكده‌هێنرێت و نوێنه‌ری هه‌ریه‌ك له‌ وه‌زاره‌ته‌كانی كاروباری شه‌هیدان و ئه‌نفالكراوان و شاره‌وانی و گه‌شتوگوزاری تیا ده‌بێت".

 

باسی لەوەشکردووە "وه‌زاره‌تی شاره‌وانی و گه‌شتوگوزار وردبینی لیستی ناوه‌كانی مامه‌ڵه‌كانی ته‌رخانكردنی زه‌وی له‌ سنووری ئیداره‌ی گه‌رمیان (كه‌لار و كفری) له‌گه‌ڵ دابینكردنی زه‌وی پێویست دەکات".

ر. ب