مەودا میدیا-

بەڕێوەبەرایەتیی ئاو و ئاوەڕۆی هەولێر رایگەیاند، بۆ ئەوەی چیتر موزایەدە بە هاوڵاتییانەوە نەكرێت، بە راشكاوی رایدەگەیەنین کە هیچ هاوبەشێكی ئاو پارەی زیادەی لێ وەرناگیرێت و ئەوەی ئەو جۆرە بانگەشەیەش دەكات، بۆ موزایەدەی سیاسییە و دوورە لە راستی.

ئەمڕۆ چوارشەممە یەکی کانوونی یەکەمی 2021 بەڕێوەبەرایەتیی ئاو و ئاوەڕۆی هەولێر روونکردنەوەیەکی بڵاوکردەوە کە تێیدا هاتووە "هەر هاوڵاتییەك كاتێك هەست دەكات هەڵەیەك لە پسوڵەی کرێی ئاو یان خوێندنەوەی پێوەرەكەی هەیە، پێویستە سەردانی بەڕێوەبەرایەتیی ئاو بكات و روونكردنەوەی پێویستی پێدەدرێت و كێشەكەشی بۆ چارەسەر دەكرێت".  

  

  ئاماژەی بەوەسکردووە "لەو سۆنگەیەوە بۆ رای گشتی رادەگەیەنین كە هەر هاوبەشێكی ئاو ئەگەر هەرچەندیش ئاو بەكاربهێنێت و پارەیەكی زۆریشی بۆ بێتەوە، بۆ هەر مانگێك لە (45 هەزار دینار) زیاتری لێ وەرناگیرێت"

ئەوەشێ روونکردووەتەوە "وەك نموونە، ئەگەر هاوبەشێكی ئاو لە ماوەی مانگێكدا تەنانەت بە بەهای زیاتر لە 100هەزار دیناریش ئاو بەكاربهێنێت، تەنیا 45 هەزار دینار دەدات، بەدەر لەوە هەر چییەك بگوترێت، راست نییە".  

  

ر. ب