مەودا میدیا-

بەڕێوەبەرایەتیی ئاسایشی سلێمانی روونکردنەوەیەکی بڵاوکردەوە لەبارەی دەستگیرکردنی گروپێکی تیرۆریستی لە پارێزگای هەڵەبجە کە سەر بە رێکخراوی تیرۆریستی داعش بوون.

لە روونکردنەوەکەدا هاتووە "لە ئەنجامی چاودێری و کۆکردنەوەی زانیاری ورد لەسەر گروپێکی سەر بە رێکخراوی تیرۆریستی داعش لە پارێزگای هەڵەبجە، پاش دەست خستنی بەڵگەی تەواو لەسەریان کە مەرامیان بوو لە سنووری پارێزگای سلێمانی و هەڵەبجە و ئیدارەی گەرمیان کردەوەی تیرۆریستی ئەنجام بدەن و ئاسایشی  ھەرێم تێکبدەن".

ئاماژە بەوەکراوە "پاش وەرگرتنی بڕیاری  بەڕێز دادوەری لێکۆڵینەوەی ئاسایشی پارێزگای سلێمانی لە ژێر چاودێری و رێنمایی سەرۆکی دەزگای ئاسایشی هەرێم، بەڕێوبەرایەتیی ئاسایشی پارێزگای سلێمانی/ هێزەکانی ئۆپەراسیۆنی ئاسایشی سلێمانی، بەهاوکاری هێزەکانی بەڕێوبەرایەتیی ئاسایشی شارەزوور،  لە ھەڵمەتێکی بەرفراوان و چەند ئۆپەراسیۆنێکی جیاجیای سەرکەوتوودا رۆژی چوارشەممە 8ی کانونی یەکەمی 2021 ژمارەیەک لە ئەندامانی تاقم و گروپی نەنستووی تیرۆریستانی داعش  لە شاری هەڵەبجە، قەزای سەیدسادق و شارۆچکەکانی خورماڵ، سیروان و چەند گوندێکی شارەزوور دەستگیرکران و دەستبەسەر ژمارەیەک لە چەک و تەقەمەنیشدا گیرا  کە  پیلانیان  دانابوو تا لە کردەوە تیرۆریستییەکانیاندا بەکاریبهێنن".

ئاسایشی سلێمانی رایگەیاند "لێرەوە بۆ کۆمەڵانی خەڵکی کوردستانی رووندەکەینەوە لەبەر سەلامەتی لێکۆڵینەوەکان و پاراستنی دۆسیەکە زانیارییەکانی پەیوەست بەم پیلانەی تیرۆریستان دەھێڵینەوە و لە داھاتوویەکی نزیکدا بە بەڵگە و دۆکۆمێنتی دروست زانیاری زیاتر لەبارەی شکستپێھێنانی تێکدانی ئارامی ھەرێم لەلایەن تیرۆریستانەوە بۆ رایگشتی بڵاودەکەینەوە".

س،ر