مەودا میدیا-

وتەبێژی وەزارەتی سەرچاوەكانی ئاوی عیراق رایگەیاند، سەرەڕای زیانە گیانی و مادییەکان، بارانەكەی چەند رۆژی رابردووی باشووری كوردستان، سوودی بۆ بەرزبوونەوەی ئاستی ئاوی هەردوو بەنداوی دوكان و دەربەندیخان هەبووە.

میدیا عیراقییەکان بڵاویانکردەوە کە عەلی رازی، وتەبێژی وەزارەتی سەرچاوەكانی ئاوی عیراق ئاشكرایكردووە "سەرەڕای زیانە گیانی و مادییەکان، باران بارینەكەی دوو رۆژی رابردوو بووەتەهۆی زیادبوونی ئاوی بەنداوەكانی دوكان، دەربەندیخان، موسڵ و عوزێم".

ئەوەشی خستووەتەڕوو "بەهۆی باران بارینەوە ئاوی رووبارەكانی زێی بچووك و خاپوور زۆربوون و ئاوی رووباری دیجلەش زیادیكردووە".

"ئەو ئاوەی بەهۆی باران بارینی هەرێمی كوردستان و ناوچەكانی باكووری عیراقەوە بەدەستهاتووە، گەیشتووە بە دەریاچەی سەرسار لە پارێزگای ئەنبار و سوودی بەو دەریاچەیەش گەیاندووە"  عەلی رازی وا دەڵێت.

ر. ئ.