مەودا میدیا-

فەرماندەیی ئۆپەراسیۆنەکانی بەغدا رایگەیاند، هەوڵێکیان شکستپێهێناوە کە تێیدا میلیشیاکان دەیانویست هێرشی مووشەکی بکەنەسەر باڵیۆزخانەی ئەمەریکا لە بەغدا.

لە راگەیەندراوێکدا ئەحمەد سەلیم، فەرماندەیی ئۆپەراسیۆنەکانی بەغدا ئاماژەی بەوەکرد "میلیشیاکان پلانییان داناوە، لە دووەم ساڵیادی کوژرانی قاسم سولەیمانی، فەرماندەی فەیلەقی قودسی سوپای پاسدارانی ئێران و ئەبومەهدی موهەندیس، جێگری سەرۆکی دەستەی حەشدی شەعبی، هێرشێکی مووشەکی بکەنە سەر باڵیۆزخانەی ئەمەریکا لە بەغدا".

ئەوەشی خستووەتەڕوو "بۆ رێگریکردنیش لە هەر هەوڵێکی لەمشێوەیە، هێزێکی ئەمنی زۆر لە بەغدا بڵاوکراونەتەوە".

قاسم سولەیمانی، فەرماندەی فەیلەقی قودسى سوپای پاسدارانی ئێران و ئەبومەھدی موھەندیس جێگری سەرۆکی دەستەی حەشدی شەعبی لە عیراق، لە سێی کانوونی دووەمی 2020 لە ئۆپەراسیۆنێکی ئەمەریکادا لە نزیک فڕۆکەخانەی نێودەوڵەتی بەغدا کوژران.

ر. ئ.