مەودا میدیا-

وتەبێژی بەنزینخانەكانی سلێمانی رایدەگەیەنێت لە ئەمشەوەوە نرخی بەنزین لە تەواوی بەنزیخانەكانی ناو شاری سلێمانی دابەزیووە.

بەهمەن قادر، وتەبێژی بەنزینخانەكانی سلێمانی بە مەودا میدیای راگەیاند "لەشەوی رابردووەوە نرخی بەنزینی بۆ هەر لیترێك 25 دینار دابەزیووە و تەواوی بەنزینخانەكانی ناو شاری سلێمانی پێوەی پابەندبوون".

ئەوەشی خستەڕوو "ئەو بڕیارە تەنها بۆ بەنزینی جۆری نۆرماڵە و جۆرەكانی تر نرخەكانیان وەك خۆیانن، هۆكارەكەشی پەیوەندی بە بۆرسەی جیهانیەوە هەیە هەروەها بەنزینێكی زۆر هاوردەی سلێمانی كراوە و بڕەكەی زۆرە".

بەهمەن قادر هەروەها وتی "نرخی جێگیری بەنزین بۆ جۆری نۆرماڵ لای ئێمە 625 دیناربوو، بەڵام ئێمە كردمان بە 600 دینار".

ئەو بڕیارە لە كاتێكدا پێشتریش بەشی زۆری بەنزینخانەكان یەك لیتر بەنزینی نۆرماڵیان بە 600 دینار فرۆشتووە و بەشێك لە بەنزینخانەكانی دەرەوەی شاریش لە خوار 600 دینار بەنزینیان فرۆشتووە.