سەرەتای شەستەکانی سەدەی رابردوو لەیادی نەورۆزی ئەو ساڵاندا مێردمنداڵبووم لە گەرەکی جەلەوەی شاری خانەقین دەژیام بە خه‌یاڵێکی کوردانه‌وه‌ لە گەڵ خەڵکی گەڕەکدا، بە ژن و پیاوەوە بە گەورە و بچوکەوە دوای خاڵو فرە بەهرەکەم مامۆستا موحسن دەکەوتین  و بە دەنگی بەرز لە قەراغ هاژەی رووباری ئەڵوەن هاوارمان دەکرد (ئیمڕۆ رۆژی خۆشییە، کاوە زوحاک کوشتییە).

ساڵی 1970هەرزەکار بووم یادی نەورۆز لە تەیارەخانەی شاری خانەقین سازکرا, یەکێک لە سونبولەکانی کوردایەتی لە شاری خانەقین مامۆستا عەزیز پشتیوان بوو، ئەو بە دەنگە پر سۆز و زوڵاڵەكەی بە دەستە راستە پڕ ئاماژەکەی هاواری دەکرد (یان کوردستان یان نەمان) وەکو بروسکەیەک لە ناخماندا دەنگیدایەوە و ئه‌و دروشمه‌ بووه‌ وزیه‌کی هەتاهەتایی کوردایه‌تی بۆ خەڵکی شارەکەم.

ساڵی 1984 لە هەڕەتی گەنجایەتی بووم یادی نەورۆز لە سورداش ساز کرا بە ئامادەبوونێکی جەماوەری بێوێنەی خەڵکی کوردستان و بە وتە پر جۆش و خرۆشەکەی هەڤاڵ مام جەلال کە دەیفەرموو (جەماوەری لە بن نەهاتووی یەکێتی) دڵنیایی بەسەر خەڵکی کوردستان دەباراند و نه‌ورۆز و پێشمه‌رگه‌و خه‌ڵک ئاوێته‌ی یه‌کبوون.

ساڵی 2012 قۆناغی کامڵبوونی دید و تێڕوانین و تێگەیشتنم بوو بۆ یادی نەورۆز کاک دلێری سەید مەجید، مامە خەمەی هەمووان، کۆمەڵێک هاوڕێ و کەسوکاری هەردوولامان، لە کانی ماسی قەراغی شاری سولەیمانیدا، میوانداری کردین و بە دیار ئاگرێکی گەورەوە و بە دەنگی زوڵاڵ و بەرزی حەسەن زیرەک سروودی (ئەم رۆژی ساڵی تازەیە نەورۆزە هاتەوە......) ئێوارەی نەورۆزمان بەسەربرد، دڵۆپ دڵۆپ خۆشەویستی و خۆشی دەڕژایە ناخی دەروونماندا.

ساڵی (2022) لە سێبەری رەشماڵی پایزی تەمەندا، یادی نەورۆز یادێكی یەکجار جیاواز لە جاران دەبینم 

په‌رته‌وازه‌یی زۆر و یەکریزی زۆر کەم
هیوا کەم و نائومێدی زۆر!
بورجی عاجی زۆر و دادپەروەری زۆر كەم!
کاوە کەم و زوحاکیش زۆر!