مەودا میدیا-

ئاسایشی سلێمانی رایدەگەیەنێت 29 قاچاخچی تریان دەستگیركردوە كە بەپارە خەڵكیان لەئێرانەوە هێناوەتەوەو بەوەش ژمارەی قاچاخچییە دەستگیركراوەكان گەیشتوەتە 44 كەس و سەرجەمیان كوردن و دانیشتوی هەرێمی کوردستانن.

بەڕێوەبەرایەتی ئاسایشی سلێمانی لە راگەیەنراوێكیدا بڵاویکردەوە "لەدرێژەی كارو چالاكیەكانی بەڕێوەبەرایەتیمان بەمەبەستی پاراستنی سەروماڵی هاوڵاتیان و نەهێشتنی هەمووجۆرە بازرگانی كردن بە مرۆڤ و هەموو جۆرە قاچاخچێتییەك و هەموو كارێكی  نایاسایی، دوای كۆكردنەوەی زانیاری و دارشتنی پلانی وورد و بەبڕیاری دادوەر و بەپێی ماددەی ( 76) لە یاسای سەرۆكایەتی هەرێم بڕگەی قاچاخچێتی مرۆڤ ،  هێزەكانی ئاسایشی سلێمانی بەهاوبەشی لەگەڵا قائیمقامیەتی قەزای چوارتا و بەڕێوەبەرایەتی پۆلیسی پاسەوانی سنورو بنكەی پۆلیسی چوارتاو  بنكەی پۆلیسی زەلان و بنكەی پۆلیسی هاتووچۆی چوارتاو بنكەی تەندروستی چوارتا و سەرجەم هێزە ئەمنیەكانی سنورەكە، ئەمڕۆ 4ی ئادااری 2020، هەستان بە هەڵمەتێكی فراوان  و كێوماڵكردنی سنورەكانی ناوچەی شارباژێر".

رونیشیكردووەتەوە "پاش چەندین سەعات پشكنینی سەرجەم خاڵە سنورییەكان و ئەو شوێنانەی كە گومانی ئەوەیان لێدەكرا كە بتوانرێت قاچاخچێتی و گواستنەوەی مرۆڤیان لێوەبكرێت  توانرا 29 قاچاخچی دەستگیربكرێن كە كۆی گشتی قاچاخچیەكان  كە تائێستا دەستگیركراون بریتین لە 44 قاچاخچی و دەستگیراوەبەسەر 27 ئۆتۆمبێل كە بۆكاری قاچاخچێتی بەكار هێنرابوون و سەرجەمیان كوردن و دانیشتوی هەرێمی كوردستانن".

ئاماژەی بەوەشکردووە "بەتۆمەتی ئەوەی لەسنورەكاندا بەرامبەر بەبڕێك پارە قاچاخچێتی بەمرۆڤەوە دەكەن بەهێنان و بردنیان بۆ ناو هەرێم و دەرەوەی هەرێمی كوردستان، بەئۆتۆمبێل و شێوازی نایاسایی سەرجەم تۆمەتباران دانیان بەتاوانەكەیاندا ناوەو روبەڕوی یاسا كرانەوە".