مەودا میدیا-

سەرۆكی فەرمانگەی هەماهەنگی و بەدواداچوونی ئەجومەنی وەزیران دەڵێت "حكومەتی هەرێمی كوردستان كاری لەسەر هەموو خاڵەكانی چاكسازی كارنامەی كابینەی نۆیەم كردووە و دوو مووچەیی لە هەرێمی كوردستان نەماوە".

عەبدولحەكیم خەسرەو، سەرۆكی فەرمانگەی هەماهەنگیی و بەدواداچوونی ئەنجومەنی وەزیران ئەمڕۆ سێ شەممە 8ی تشرینی دووەمی 2022 لەمیانی كۆنفڕانسی هەڵسەنگاندنی پڕۆسەی چاكسازی و رووبەڕووبوونەوەی گەندەڵی كە لە شاری هەولێر بەڕێوەچوو رایگەیاند "دوو مووچەیی لە هەرێمی كوردستان نەماوە و لەگەڵ وەزارەتی داریی و ئابوری موچەی هەموو ئەوانەمان بڕیوە كە دوو مووچەیان هەبووە و لە ئێستادا تەنيا مووچەیەك وەردەگرن".

سەرۆكی فەرمانگەی هەماهەنگی و بەدواداچوون جەختی لە بەردەوامی هەنگاوەكانی چاكسازی حكومەتی هەرێمی كوردستان كردەوە و وتی "حكومەتی هەرێمی كوردستان‌ كاری لەسەر 13 خاڵەكەی چاكسازی كارنامەی كابینەی نۆیەم كردووە و ئاستی جێبەجێكردنی خاڵەكانیش لە سێكتەرێكەوە بۆ سێكتەرێكی دیكە جیاوازبووە".

ك. م