مەودا میدیا-

پەرلەمانی كوردستان ئیدانەی هێرشە مووشەكییەكانی شەوی رابردووی سەر هەرێمی كوردستان دەكات و داوادەكات "ئەنجوومەنی ئاسایشی نێوەدەوڵەتی و كۆمەڵگەی نێودەوڵەتییە بۆ پاراستنی ئاسایشی ناوچەیی و جیهانی و بەرگرتن لە پەرەسەندنی ناسەقامگیری، بە ئەركی سەر شانیان ھەڵبستن".

پەرلەمانی كوردستان لە راگەیەندراوێكدا دەڵێت "بە نیگەرانییەكی زۆرەوە لە دوایین ھێرشی مووشەكی و درۆنی ھێزەكانی كۆماری ئیسلامیی ئێران لە شەوی 2022-11-21/20 بۆ سەر چەند ناوچەیەكی پارێزگای ھەولێر و پارێزگای سلێمانی دەڕوانین و بەتووندی ئیدانەی ئەم ھێرش و پەلامارە بێپاساوانە دەكەین".

راشیگەیاندووە "وێڕای جەختكردنەوە لە پێویستیی پەرەپێدانی پەیوەندییەكان لەگەڵ سەرجەم درواسێكان لەسەر بنەمای ڕێزی ھاوبەش و بەرژەوەندیی ھاوبەش و دەستوەرنەدان لە كاروباری ناوخۆی یەكتری و پابەندبوونی تەواو بە یاسا و رێسا نێوەدەوڵەتیێەكان، ھێرش و پەلاماری سەربازی لەھەر لایەكەوە بێت سەركۆنە دەكەین و پێمان وایە چارەسەر و میكانیزمی سەربازی نەك ھیچ كێشەیەك چارەسەر ناكات، بەڵكو ئاسۆی چارەسەری و ئاشتیی ناوچەیی دەخاتە مەترسیی زیاترەوە".

پەرلەمانی كوردستان لە كۆتاییدا داوا لە حكوومەتی فیدڕاڵ دەكات "زیاتر بە ئەركی دەستووریی خۆی بۆ پاراستنی سەروەریی عیراق بە ھەرێمی كوردستانیشەوە ھەستێت و ھەموو رێگایەكی دیپلۆماسی بۆ ئەو ئامانجە بگرێتە بەر".