مەودا میدیا_

پۆلیسی سلێمانی رایگەیاندووە "مەفرەزەكانی بنكەی پۆلیسی تاسڵوجە تۆمەتبارێكیان دەستگیركرد كە لەسەر دۆسیەی كوشتنی كەسێك لەلایەن دادگای لێكۆڵینەوەی كفرییەوە داواكراوبووە ".

راگەیاندن و پەیوەندییەكانی بەڕێوەبەرایەتیی پۆلیسی پارێزگای سلێمانی بڵاویكردووەتەوە "دوای ئەوەی فەرمانێكی گرتن لەلایەن دادگای لێكۆڵینەوەی كفرییەوە لەسەر تۆمەتبارێك گەیشتە بەڕێوەبەرایەتیمان، بەڕێوەبەری پۆلیسی پارێزگای سلێمانی سەرجەم بنكەكانی راسپارد كە بەدواچوون و لێكۆڵینەوە بكەن بۆ دۆزینەوە و دەستگیركردنی تۆمەتبار" .

باس لەوەشكراوە "دوای لێكۆڵینەوە و بەدواداچوونەكان توانرا لەلایەن بنكەی پۆلیسی تاسڵوجەوە تۆمەتبار بدۆزرێتەوە و دەستگیربكرێت كە داواكراوبووە لەسەر دۆسیەی كوشتنی كەسێك  و لەئێستادا تۆمەتبار ( م ، م ، ع)  لەدایكبووی 1999 بەبڕیاری دادوەرو بەپێی ماددەی 406 لەیاسای سزادانی عیراقی راگیراوە و دوای تەواوكردنی رێكارە یاساییەكان رەوانەی شوێنی داواكراو دەكرێتەوە".

ك م