مەودا میدیا-

 

فیدراسیۆنی نێودەوڵەتی رۆژنامەنووسان راپۆرتی ساڵانەی خۆی بڵاوکردەوە، لە راپۆرتەکەدا هاتووە ئاماری کوشتنی رۆژنامەنووسان بۆ ساڵی 2022 زیادی کردووە و67 رۆژنامەنووس کوژراون ، هەر بۆیە رێژەی کوژرانی رۆژنامەنووسان بەرز بووەتەوە بۆ %30. 

فیدراسیۆنی نێودەوڵەتی ڕۆژنامەنووسان لە ڕاپۆرتی ساڵی 2022  ئاماری کوژران و دەستگیرکردن و پێشێلکارییەکانی بەرامبەر رۆژنامەنووسانی لە جیهاندا بڵاوکردەوە و نیگەرانی خۆی دەربڕی لە بەرزبوونەوەی ئاماری کوشتنی رۆژنامەنووسان و پێشێلکردنی مافەکانیان.

لە ئامارەکەدا هاتووە ئەمساڵ 67 رۆژنامەنووس کوژراون  کە ئەو ئامارەش لەچاو ئاماری ساڵی پار کە 47 رۆژنامەنووس کوژرابوون زیادی کردووە.

لە ئامارەکەشدا هاتووە کە 375 رۆژنامەنووس دەستگیر کراون و لە زینداندان، لەو رێژەیەش زۆرترینیان لە میانمار، چین و تورکیان بەندکراون.

هۆکاری کوشتنی رۆژنامەنووسانیش زیاتر بۆ بوونی شەڕ و ئاڵۆزی لەناوچە جیاوازەکان دەگەڕێتەوە بە تایبەت شەڕی رووسیا و ئۆکرانیا، ئاڵۆزییەکانی هایتی و مەکسیک.

فیدراسیۆنی نێودەوڵەتی ڕۆژنامەنووسانی جیهان، سەربەخۆ کاردەکات و لە 140 وڵاتی جیهان 600 ئەندامی هەیە.

 ژ.م