مەودا میدیا-

وەفدی حكومەتی هەرێمی كوردستان و ئەنجومەنی وەزاریی ئابوری حكومەتی فیدراڵ كۆبوونەوە و بۆچوونی حكومەتی هەرێم لەبارەی پرەنسیپە گشتییەكانی پرۆژە یاسای بودجەی 2023ی گشتی عیراق ئاشكرا كرد و بەپێویست زانرا دەستور و كارنامەی نوێی حكومەتی عیراق بكرێتە بنەمای رێككەوتن.

وەفدی حكومەتی هەرێمی كوردستان ئەمڕۆ دووشەممە 12ی كانوونی یەكەمی 2022، لەگەڵ ئەنجومەنی وەزاریی ئابووری حكومەتی فیدراڵی كۆبوونەوە و دید و بۆچوونی حكومەتی هەرێمیان لە بارەی پرەنسیپە گشتییەكانی پرۆژە یاسای بودجەی ساڵی 2023 خستەڕوو و بە پێویستیان زانی دەستوور و كارنامەی حكومەتی نوێی عێراق، ببێتە بنەمایەك بۆ رێكەوتن لەسەر ئەو بابەتە.

ئەنجومەنی وەزاریی ئابوری حكومەتی فیدراڵ ئاماژەیان بە بنەماكانی سیستەمی فیدڕاڵیان كردەوە بۆ بەهێزكردنی پەیوەندییەكان لەگەڵ وەزارەتە هاوتاكانی حكومەتی هەرێمی كوردستان.

وەفدی حكومەتی هەرێم پێكهاتبوون لە ئاوات جەناب نوری، وەزیری دارایی و ئابووری، كەمال محەمەد، وەزیری كارەبا، د.ئومێد سەباح، سەرۆكی دیوانی ئەنجومەنی وەزیران، د.عەبدولحەكیم خەسرۆ، سەرۆكی فەرمانگەی هەماهەنگی و بەدواداچوون، د.جوتیار عادل، وتەبێژی حكومەتی هەرێمی كوردستان، هادی چاوشلی، سەرۆكی دیوانی چاودێری دارایی هەرێمی كوردستان و فارس عیسا، سەرۆكی نوێنەرایەتی حكومەتی هەرێم لە بەغدا.
لەدوای دەستبەكاربوونی حكومەتی نوێی عیراق و هەوڵەكان بۆ ئامادەكردن و پەسەندكردنی بودجەی 2023ی عیراق وەفدی حكومەتی هەرێم سەردانەكانیان بۆ بەغدا دەستپێكردووەتەوە بەڵام تا ئێستا باس لە رێككەوتنی كۆتایی نەكراوە".

ك م