کوردستانی
بافڵ جەلال تاڵەبانی؛ ستایشی هەڵوێستی لەمێژینەی حزبی شیوعی كرد بۆ پشتگیریكردن لە مافەكانی گەلی كورد
مەودا میدیا - سلێمانی |
مەودا میدیا-
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغدا پێشوازیکرد لە رائید فەهمی، سکرتێری گشتیی حزبی شیوعیی عیراق.
لە دیدارێكدا دۆخی گشتیی وڵات و یەكخستنی هەوڵە نیشتمانییەكان بۆ چارەسەركردنی كێشەكان و پاراستنی سەقامگیری لە ناوچەكە گفتوگۆی لەبارەوەكرا و جەخت لە پەرەپێدانی پەیوەندییەكانی نێوان هەردوولا كرایەوە لەپێناو بەدیهێنانی ئامانجە باڵاكان.
سکرتێری گشتیی حزبی شیوعیی عیراق ئاماژەی بەو رۆڵە مێژووییەی سەرۆك مام جەلال كرد لە رووخانی دیكتاتۆرییەت و بونیادنانی عیراقی نوێ و رایگەیاند، وڵات پێویستی ئەو سیاسەتە حەكیمانەیەیە كە سەرۆك مام جەلال پەیڕەوی دەكرد و لەخزمەت بەرژوەندی گشتیدا بوو، بەخۆشحاڵییەوە ئەمڕۆش سەرۆك بافڵ درێژەپێدەری هەمان سیاسەتە و رۆڵێكی كاریگەر دەگێڕێت لە كۆكردنەوەی دەنگە جیاوازەكان و هەنگاونان بە ئاڕاستەی سەقامگیری لە عیراق.
لەبەرامبەردا سەرۆک بافڵ ستایشی هەڵوێستی لەمێژینەی حزبی شیوعی كرد بۆ پشتگیریكردن لە مافەكانی گەلی كورد و هیوای خواست ئەم تەبایی و پێكەوەییە بەردەوامی هەبێت.
ژ.م