مەودا میدیا - رۆژ عەدنان

 

ئەندامێکی ئەنجومەنی نوێنەرانی عیراق رایدەگەیەنێت کە زمانی کوردی زمانی فەرمییە و دەبێت لە هەموو فەرمانگەیەک کاری پێبکرێت چونکە دەستوورییە و کارنەکردن پێی پێشێلکارییە.

 

ئەمڕۆ 1ی ئازاری 2023 دارا ئەحمەد حەسەن سیکانیانی، ئەندامی ئەنجومەنی نوێنەرانی عیراق بە مەودا میدیای راگەیاند "زمانی کوردی دەبێت لە هەموو بوارەکاندا کاری پێبکرێت، چونکە بڕیارێکی فەرمییە و بەکارنەهێنانی لە هەر شوێنێک، پێشێلکردنی بەندێکی دەستوورییە ".

 

ئەو ئەندامی ئەنجومەنی نوێنەران ئەوەشی خستەڕوو " پێموایە هەرکەسێک رێگری بکات لە بەکارهێنانی زمانی کوردی رەفتارێکی تایبەتییە و زمانەکانی کوردی و عەرەبی زمانی فەرمی وڵاتن کە دەبێت بەکاربهێندرێت و لەسەر هەر پسوڵەیەکی فەرمی هەردوو زمانەکە دەبێت بوونی هەبێت ".

 

باسی لەوەشکرد "لە دەستووری عیراقیدا هاتووە کە دەبێت زمانی کوردی و زمانی عەرەبی هەبێت، هەر کەسێک کە لە پۆستێکی ئیداریدا فەرمانەکە جێبەجێ نەکات ئەوە مەرامێکی تایبەتییە  و ئەو کارە لە ئەجێندای حکومەتی لەپشت نییە ".