مەودا میدیا -

 

قائیمقامیەتی دەربەندیخان رایدەگەیەنێت ئەمڕۆ لە کۆبوونەوەی لیژنەی ئەمنی قەزای دەربەندیخاندا چەند بڕیارێک لەبارەی رۆژانی نەورۆز درا و سەرجەم هێزەکانی ناوخۆش دەخرێنە حاڵەتی ئامادەباشییەوە.

 

لە کۆبوونەوەکەی قائیمقامیەتی قەزای دەربەندیخاندا ئەم بڕیارانەدران: 

 

- خستنە حاڵەتی ئامادەباشی هێزەکانی ناوخۆ و دابەشکردنیان بەسەر سەرجەم شوێنە گەشتیارییەکانی سنوری قەزای دەربەندیخان بۆ رۆژی نەورۆز و رۆژانی دوای.

- قەدەغەکردنی ئەو بەلەمانەی لە دەریاچەی دەربەندیخان گەشتیار دەگوازنەوە، ئەوەش بەهۆی نەبوونی مەرجی سەلامەتی تیایاندا.

- قەدەغەکردنی هاتووچۆکردنی ماتۆڕسکیل و بارهەڵگری گەورە بۆ سەیرانگا و شوێنە گەشتیارییەکان لە رۆژانی نەورۆزدا.

- دەستبەسەرداگرتنی چەکی بێ مۆڵەت و ئامرازەکانی تەقەکردن و شەڕکردن.

- خستنە حاڵەتی ئامادەباشی تیمی ژێرئاوگەڕ(غەواصە) لە دەریاچەی دەربەندیخان بۆ هەر رووداوێکی نەخوازراو.

- بەڕێوەبەرایەتی تەندروستی دەربەندیخان راسپێدران بۆ دانانی تیمی تەندروستی لە شوێنە گەشتیارییەکان بۆ روودانی هەر حاڵەتێکی نەخوازراو.

هەر لە کۆبوونەوەکەدا سەرۆکی شارەوانی دەربەندیخان ڕاسپێدرا بە جێبەجێکردنی ئەم کارانە:

- رێکخستنی ناوبازاڕ و لابردنی ئەو زیادەڕەویانەی کراونەتە سەر شۆستە و شەقامەکانی ناو شاری دەربەندیخان.

- چارەسەرکردنی کێشەی مانگای بەرەڵا و دەستبەسەردا گرتنی لە ناو شەقام و باخچە و شوێنە گشتییەکان.

- رێکخستنەوەی سنوری کارگەکانی بەردهاڕین و لێپێچینەوە لەو کارگانەی زیادەڕەویان کردووەتە سەر شەقام و شۆستە و زەوییەکانی دەرەوەی نەخشەی خۆیان، هەروەها پابەندکردیان بەو کاتەی بۆیان دیاریکراوە بۆ کارکردن لەگەڵ تەواوکردنی هەوڵەکان بۆ دورخستنەوەیان بۆ دەرەوەی سنوری قەزای دەربەندیخان.

ر.ع