مەودا میدیا-

شارەزایەکی کەشناسی رایدەگەیەنێت بارانبارین و هەورەگرمە و هەورە تریشقە و خێرایی با ناوچە جیاوازەکانی هەرێمی کوردستان دەگرێتەوە، ئاماژە بەوەشدەکات ئەگەری دروستبوونی لافاو هەیە.

پشتیوان ئیبراهیم، شارەزای بواری کەشناسی بە مەودا میدیای راگەیاند "رۆژی چوارشەممە 15ی ئاداری 2023 شەپۆلێکی بارانبارین کە سەرچاوەی دەریایی ناوەڕاست و شێی دەریایی سوورە كەشێكى باراناوى ناوچەكانمان دەگرێتەوە كە خۆى دەبینێتەوە لە بارانى پچرپچر و هەندێک كات بارانى به خوڕ و هەورەگرمە و هەورە تریشقەی لەگەڵ دەبێت و رێژەی بارانبارین بەپێی ناوچەکان جیاوازە و بەپێی نەخشەکان ڕێژەی بارانەکە بۆ سنوورەی پاڕێزگاکانی هەولێر، دهۆک و موسڵ لەگەڵ قەزا و ناوحیە و گوندەکانی دەوروبەریان باشترە و ئەگەری دروستبوونی لافاو و ئاستەنگی هاتوچۆ هەیە".

ئاماژەی بەوەشکرد "بۆ ناوچەکانی سلێمانی و هەڵەبجە و گەرمیان و دەوربەریان باران بارینی مامناوەندە و بارانەکە گشتی دەبێت و سەرجەم ناوچەکان باران دەباڕێت، هەروەها ناوبەناو خێرایی با چالاک دەبێت لە 25 کلم بۆ 40کلم لە کاتژمێرێکدا بەپێی کات و شوێن گۆڕانکاری روودەدات و لە ناوچە شاخاوییەکان خێراییەکە زیاترە، هەروەها پلەکانی گەرمایش دەست بەنزمبوونەوە دەکات".

ئەو شارەزای کەشناسە راشیگەیاند "ئەگەر هیچ گۆڕانکاریەک روونەدات لە 19ئ ئاداری 2023 دووبارە شەپۆلێکی دیکە ناوچەکەکانمان دەگرێتەوە".

س.ر