مەودا میدیا -

 

وتەبێژی وەزارەتی پەروەردەی حکومەتی هەرێمی کوردستان رایدەگەیەنێت کە دەسەڵاتی راگرتنی دەوام لە ناوەندەکانی خوێندن دراوە بە پەروەردەی پارێزگا و ئیدارە سەربەخۆکان.

 

ئەمڕۆ 11ی نیسانی 2023 سامان سیوەیلی، وتەبێژی وەزارەتی پەروەردەی حکومەتی هەرێمی کوردستان رایگەیاند "دەسەڵاتی تەواوەتیمان داوەتە پەروەردەی پارێزگاکان و ئیدارە سەربەخۆکان لەبارەی راگرتنی دەوامەوە لە ناوەندەکانی خوێندندا  بەهۆی بارانبارینەوە".

 

ئەوەشی خستەڕوو "بە پشتبەستن بە راپۆرتەكانی بەڕێوەبەرایەتیی گشتیی كەشناسی و لەکاتی بوونی هەر مەترسییەک لەسەر خوێندکاران و مامۆستایان دەتوانن راوێژ لەگەڵ لێپرسراوی ئیدارە سەربەخۆکانی خۆیان بکەن و بڕیاری راگرتنی دەوام بدەن".

 

ئەمە لەکاتێکدایە بەهۆی هاتنی شەپۆلێکی بەهێزی بارانەوە کەشناسانی هەرێمی کوردستان و عیراق هۆشدارییان داوەتە هاوڵاتییان کە ئاگاداربن و بۆ کاری پێویستی نەبێت لە رۆژانی داهاتوودا و لەکاتی باراندا نەچنە دەرەوەی ماڵەکانیان.

ر.ع