مەودا میدیا -

 

پێش دوو رۆژ و لە لافاوەکەی کەرکوکدا لە گوندی تەرجلی سەر بە ناحیەی لەیلان لە پارێزگای كەركوك ئۆتۆمبێلێکی سەربازیی سوپای عیراق ئاو بردی و کە ئەفسەرێک و دوو سەربازی تێدابوون.

 

ئەمڕۆ هەینی لە نزیک ناحیەی لەلایەن، تەرمی ئەو سەربازە دۆزرایەوە کە لە لافاوەکەی کەرکوکدا، رۆژی چوارشەممەی رابردوو ئۆتۆمبێلەکەیان ئاوبردی و تاوەکو ئەمڕۆ بێسەروشوێن بوو.

 

رۆژی چوارشەممەی رابردوو دوای ئەوەی لێزمەباران لە کەرکوک دەستی پێکرد، لافاو لە چەندین گوند و ناوچەی سنووری کەرکوک دروستبوو، لافاوەکەی گوندی تەرجیلی ناحیەی لەیلان زۆر بەهێزبوو و بەوهۆیەوە ئۆتۆمبێلێکی سەربازیی سوپای عیراقی لەگەڵ خۆی بردووە.

 

لە ئۆتۆمبێلەکەدا دوو سەرباز و ئەفسەرێک بوونیان هەبووە، ئەفسەرەکە توانیویەتی بە زوویی خۆی دەرباز بکات، دوای کەمێک سەربازێکی دیکەشیان توانیویەتی خۆی لە ئۆتۆمبێلەکە بێنێتە دەرەوە و دەربازی ببێت.

 

ئۆتۆمبێلەکە، دوێنێ پێنجشەممە لە ناوچەیەکی دوور لە شوێنی رووداوەکە دۆزراوەتەوە بەڵام سەربازەکەی کە نەیتوانیبوو خۆی دەرباز بکات لەنێویدا نەبووە و هیچ زانیاریەیکیش دەربارەی نەزانراوە.

 

ئەمڕۆ هەینی لە ناوچەیەکی نزیک لە شوێنی ئۆتۆمبێلەکە تەرمی ئەو سەربازە دۆزرایەوە کە نەیتوانیبوو خۆی دەرباز بکات و بەمەش هەڵمەتی گەڕان بەدوایدا کۆتاییهات.

ر.ع