مەودا میدیا-

دەزگای ئاسایشی هەرێمی کوردستان دەستگیرکردنی دوو داواکراوی لە یاسا هەڵاتووی بەپێی مادەی چواری تیرۆر راگەیاند کە لە عیراقەوە داواکرابوون.

لە راگەیەندراوێکدا دەزگای ئاسایشی هەرێمی کوردستان رایگەیاند "لەسەر بنەمای زانیاریی هەواڵگری و بەدواداچوون و کارکردنی بەردەوام بۆ پاراستنی ئارامی و ئاسایشی هەرێمی کوردستان ، بەڵگەمان دەستکەوت لەسەر بوونی دوو تیرۆریستی لە یاسا هەڵهاتوو کە لە شارەکانی عیراقەوە هاتوونەتە شارەکانی هەرێم بە مەبەستی خۆحەشاردان".

ئاماژە بەوەشکراوە "دوای وەرگرتنی رەزامەندی دادوەری لێکۆڵینەوەی ئاسایش بە هەماهەنگی و هاریکاری بەڕێوەبەرایەتیی ئاسایشی پارێزگای سلێمانی و دەزگا هەواڵگرییەکانی عیراق هێزەکانمان لێکۆڵینەوەیان دەستیپێکرد و سەرەنجام لە شەوی یەکشەممە رێکەوتی 30ی نیسانی 2023 لە دوو هەڵمەتی جیادا هەردوو تیرۆریست (س ، م ، ع ) و (ر ، م ، ع )کە داواکراوبوون بە مادەی چواری تیرۆر لە پارێزگای سلێمانی دەستگیراکران کە یەکێک لە داواکراوان بە برینداری دەستگیرکرا و ئەم کەیسەش دوای لێکۆڵینەوەی زیاتر رادەستی دەسەڵاتی دادوەری عیراق دەکرێتەوە".

س.ر