مەودا میدیا - رۆژ عەدنان 

سەرۆکی کۆمەڵگەی کێڵگە پەلەوەرییەکان رایدەگەیەنێت نرخی مریشک گران نەبووە و شەوی رابردوو یەک کیلۆ مریشک لە ناو دەواجنەکاندا بە دوو هەزار و 600 دینار فرۆشراوە.

 

ئەمڕۆ سێشەممە 20ی حوزەیرانی 2023 نازم عەبدوڵڵا، سەرۆکی کۆمەڵگەی کێڵگە پەلەوەرییەکان بە مەودا میدیای راگەیاند "نرخی مریشک گران نەبووە و ئەوەی باس دەکرێت دوورە لە راستییەوە، شەوی رابردوو یەک کیلۆ مریشک لەناو دەواجنەکاندا بە دوو هەزار و 600 دینار فرۆشراوە".

 

باسی لەوەشکردووە "تێچووی یەک کیلۆ مریشک لەسەر دەواجنەکان نزیکەی دوو هەزار و 800 دینار دەکەوێت و بۆیە بە هیچ شێوەیەک مریشک گران نەبووە".

 

ئەوەشی خستەڕوو "بۆ جەژنی قوربان لەو بڕوایەدانیم کە زۆر گران ببێت و ئەوپەڕی بۆ هەر کیلۆیەک 200 دینار یان هەرزان دەبێت یاخود گرانتر ببێت".

 

نازم عەبدوڵا وتیشی "بەهۆی بڵاو بوونەوەی نەخۆشییەک لە %30ی کێڵگە پەلەوەرییەکانی کوردستانی گرتووەتەوە زەرەرێکی زۆری لە گیرفانی خاوەن پرۆژەکان داوە و ئەو نەخۆشییەش هیچ زەرەرێکی بۆ خواردنی هاوڵاتییان نییە، تاکە زەرەر، بەهۆی ئەو نەخۆشییەوە بۆی هەیە نیوەی جوجک و مریشکەکانیان بمرن".

 

مریشک فرۆشێکیش بە مەودا میدیای راگەیاند "لەچاو رۆژانی پێشوودا نرخی مریشک دابەزیوە و نزیکەی 150 بۆ 200 دینار دابەزیوە".

 

ئەو مریشک فرۆشە جەختیشی کردەوە "گەر هاوڵاتییان بیانەوێت مریشک بکڕن ئەوا بە دوو هەزار و 950 دینارە و نرخەکەی دابەزیوە لەچاو چەند رۆژی پێشوودا".

ر.ع