مەودا میدیا-

وەزارەتی كۆچ و كۆچبەرانی عیراق گەڕانەوەی 108 خێزانی ئاوارەی ئێزدی بۆ زێدی خۆیان راگەیاند.

لە راگەیەندراوێكی فەرمیدای ئەمڕۆ هەینی 23ی حوزەیرانی 2023، وەزارەت كۆچ و كۆچبەرانی عیراق گەڕانەوەی 108 خێزانی ئاوارەی ئیزدی لە كامپی شاریای دهۆكەوە بۆ شەنگال راگەیاند.

ئاماژە بەوەشكراوە، گەڕانەوەی ئەو خێزانانە لە چوارچێوەی جێبەجێكردنی بەرنامەیەكی كاری حكومیدایە بە هەماهەنگی لەگەڵ هێز و حكومەتەكانی ناوەند و هەرێم، بۆ دەستەبەركردنی ئاسایشی گەڕانەوەی ئاوارەكان.

كۆی گشتی لەماوەی هەفتەی رابردوودا بەپێی ئامارە راگەیەندراوەكانی وەزارەتی كۆچ و كۆچبەران، 440 خێزانی ئاوارەی ئێزدی لە كامپەكانی دهۆكەوە گەڕێندراونەتەوە شەنگال.

لەلایەكی دیكەوە بەپێی ئامارەكانی فەرمانگەی میدیا و زانیاریی حكومەتی هەرێم، لە ناوچەكە نزیكەی یەك ملیۆن ئاوارە هەیە و تەنها لەسەدا 30ی ئاوارەكان لەناو كامپدا دەژین و ئەوانی دی لەناو دانیشتواندان.

ژ.ع