مەودا میدیا- سازگار ئەحمەد

بەڕێوەبەری گشتیی چاکسازییەکانی هەرێمی کوردستان رایدەگەیەنێت لە چاکسازییەکانی هەرێمی کوردستان پێنج هەزار و 39 بەندکراو هەیە، ئاماژە بەوەشدەکات یەک هەزار و 27 کەس لە چاکسازییەکاندا لەسەر مادەی هۆشبەر دەستگیرکراون.

ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان بە مەودا میدیای راگەیاند "لە چاکسازییەکانی هەرێمی کوردستان پێنج هەزار و 39 بەندکراو هەیە، هەروەها 446 کەس سزای لەسێدارەیان بۆ دەرچووە".

وتی "لە شەش مانگی ئەمساڵدا سێ هەزار و 32 کەس هاتوونەتە چاکسازییەکان، هەروەها سێ هەزار و 31 زیندانیش ئازادکراون، هەروەها لەزینداندا 75 خولی جیاواز بۆ زیندانیان کراوەتەوە و 131 سیمینار و ۆرکشۆپ ئەنجام دراون".

وتیشی "32 هەزار و 998 کەس لەم شەش مانگەدا سوودمەند بوون لە خزمەتگوزارییە تەندروستییەکان، هەروەها 388 خوێندکار لە قۆناغەکانی خوێندن هەیە و 601 سزادراویش لەناو چاکسازییەکان کاریان کردووە".

بەڕێوەبەری گشتیی چاکسازی هەرێم  دەڵێت "کۆی مۆڵەتی ماڵەوە بۆ سزادراوان لەم شەش مانگەدا 156 کەس بوون و سێ هەزار و 45 ژوانگەی خێزانیش ئەنجام دراون".

دەشڵێت "631 کەسیش لەم شەش مانگەدا بە مەرج ئازادکراون و چوار لێبوردنی تایبەتیش هەبووە لەلایەن سەرۆکی هەرێمی کوردستانەوە، هەروەها 15 خول و چالاکی جۆراوجۆریش بۆ زیندانیان هەبووە".

لەبارەی ئەو کەسانەی بەهۆی مادەی هۆشبەرەوە دەستگیرکراون ناوبراو وتی "لە چاکسازییەکاندا یەک هەزار و 27 کەسمان هەیە لە چاکسازییەکاندا کە بەهۆی مادەی هۆشبەرەوە دەستگیرکراون کە 431 زیندانیان بازرگان و 596 زیندانییەکەی دیکەش بەکارهێنەری مادەی هۆشبەرن".

باسی لەوەشکرد "ئەمڕۆ لەناو چاکسازییەکان دەستبەکار دەبن بۆ پاسەوان و چاودێر کە لەلایەن حکومەتی هەرێمی کوردستانەوە بڕیاری دەستبەکاربوونیان دراوە".

س،ر