مەودا میدیا-

تیمێکی نێودەوڵەتیی لە زانایان جۆرە مۆزێكی دەستکاریکراوی بۆماوەیییان دروستکردووە کە بە شێوەیەکی بەرچاو مادەی خۆراکیی زیاتری تێدایە، بەتایبەتی ڤیتامین ئەی و ئەوەش دەبێتە هۆی رزگاركردنی ژیانی ملیۆنان كەس لە جیهان.

کەمیی ڤیتامین ئەی سەدان ساڵە بووەتە هۆی مەرگی دانیشتوانی وڵاتانی هەژار لە ئەفریقا و باشووری رۆژهەڵاتی ئاسیا، بەهۆی ئەوەی كەمیی ڤیتامینەكە رێگری لە گەشەی منداڵان دەکات و دەبێتەهۆی نابینابوون و بەرگرییان بەرامبەر نەخۆشییە کوشندەکانی وەک سکچوون و سورێژەبە ئاستێكی بەرچاو لاوازدەکات.

بەپێی مەزەندەی رێکخراوی تەندروستیی جیهانیی 190 ملیۆن منداڵی تەمەن پێش قوتابخانە لە سەرانسەری جیهان بەدەست کەمیی ڤیتامین ئەی دەناڵێنن و بەدخۆراکیی تەنها لە ئەفریقا رێژەی 6%ی مردنی منداڵان پێکدەهێنێت. 

بەهۆی بەرهەمهێنانی ئەو میوەیە بە شێوازێكی نوێ، لەوانەیە لە داهاتوویەکی زۆر نزیکدا چارەسەرێکی هەرزان و بەردەوام بۆ بەدخۆراکیی و کەمیی ڤیتامین A بەردەستبێت و ببێتەهۆی رزگاركردنی گیانی ئەو كەسانەی بەهۆیەوە دەناڵێنن.

نەیشناڵ جیۆگرافی لەوبارەیەوە بڵاویكردەوە، "سوپەربەنانا" كە بەرهەمە نوێیەكەیە ئامادەیە بۆ چاندن، بەڵام زانایان هێشتا چاوەڕێی رەزامەندیی حکومەتی خۆجێیی دەکەن. 

ژ.ع