مەودا میدیا-

 لەلایەن تیمێکی هاوبەشی بەڕێوەبەرایەتیی شوێنەواری سلێمانی و زانکۆی چوبۆی ژاپۆنی، شوێنەوارێکی گرنگ لە گردی یاسین تەپە لە ناحیەی تانجەرۆی سلێمانی دۆزرایەوە کە مێژووەکەی بۆ زیاتر لە دوو هەزار و پێنجسەد ساڵ پێش ئێستا دەگەڕێتەوە.

 د. هەڤاڵ ئەبوبەکر، پارێزگاری سلێمانی رایگەیاند: لە ماوەی هەفتەیەک کارکردنی تیمەکەدا، بەرهەمی زۆر باشی هەبووە و شتی دەگمەن و گرنگی تێدا دۆزراوەتەوە، کە لە عێراق و کوردستاندا تەنها لێرە هەیە.

 ئاماژەی بەوەشکردووە؛ بەپێی چینە زانستییەکان، لە سەردەمی چاخی بەردینی نوێوە دەستپێدەکات، تا سەردەمی ئیسلامی، هەروەها ئەم تیمە تایبەتە لە چینی سەردەمی ئاشووری کاردەکەن و پاشماوەی خانوو و کۆڵان و شوێنی ناشتن دۆزراونەتەوە لەگەڵ پارچەی شوێنەواریی دەگمەن و ناوازە.

پارێزگاری سلێمانی راشیگەیاند: ئەم زەوییە، بەشێوەیەکی زۆر سەرنجڕاکێش و ناوازە بە بەرد چنراوە، دەتوانین بڵێین بەشێوەیەکی ئەندازەیی کراوە و جێی تێڕامان و سەرنجلێدانە.

س.ر