باشترین میکانیزم بۆ یەکخستنی هێزەکانی هەرێم، خوودی یەکێتی و پارتییە کە بێن و بەدروستی چۆنێتی یەکخستنەوەیان رێکبخەن، دەنا بێگانە بۆ مەرامی خۆی رێکماندەخات نەک لەبەر خاتری چاوی جوانمان.

چەند جارێک بە تێهەڵکێش لە وتاردا ئەمەم وتووە: ئەمەریکا بۆیە لەژێر هەڕەشەی بڕینی هاوکاریی مانگانەی هێزی پێشمەرگەدا داوای هەرچی زووتر یەکخستنی هێزەکانی 70 و 80 دەکات، تا هێزێکی پتەوی کۆکراوەی وێنەی هێزەکانی ڤاگنەری لێدروست بکات و هەرکات ویستی بیکات بە گژ ئەو لایەنەدا کە دەیەوێت. ئەمەریکا، ئێران بە دوژمنی بەرژەوەندییەکانی خۆی و ئیسرائیل دەزانێت، لەبەرئەوە دەبێت بڵێین پیلانی یەکەمیان ئێرانە و پێدەچێت سوپایەکیشیان لە پێشمەرگە هەر بۆ ئەوە بووێت و دەیانەوێت جیاوازیی بۆچوونەکانیان لەم رێگەیەوە نەهێڵن.

کێشەکە هەر یەکخستنەوەی پێشمەرگە نییە
ئەگەر ئەمە راست نییە و جێی گرنگی پێدانی ئەمەریکا نییە، خۆ ئێمە کێشەی لەوە گەورەترمان هەیە و ئەمەریکا تائێستا رۆڵ و هەژموونی خۆی بۆ یەکلاکردنەوەی بەکارنەهێناوە، لەوانە مادەی 140 و کێشەی جێناکۆکەکان لەگەڵ حکومەتی فیدراڵی، پێنەدانەوەی مووچە پاشەکەوتکراوەکان لای حکومەتی هەرێم، دۆخی پەیوەندیی نێوان هەرێم و عیراق و نەمانی متمانە لە هەناردەکردنی نەوت، هەڕەشەکانی تورکیا و هێرشە درۆنییەکان و راگرتنی  گەشتەکانی هێڵی ئاسمانی تورکیا بۆ سلێمانی بە بیانووی پەکەکە، ئەو پەکەکەیەی کە لە سوریادا هاوپەیمان و دۆستی پتەوی ئەمەریکان لە رێگەی پەیەدەوە، بەرپرسێکی ئەمەریکی کە دەچێتە سەردانیکردنی بەرپرسێکی رۆژئاوا، بە دیوارەکەیەوە وێنەیەکی عەبدوڵڵا ئۆجەلان هەڵواسراوە.

ئەمەریکا دەزانێت بێهوودەیە
ئەمەریکا دەیەوێت ڤاگنەری کوردی لێرەوە دروستبکات، دەنا باش دەزانێت دوو هێزی پێشمەرگە لە هەرێم کە سەر بە دوو حزبن و مێژوویەکیان هەیە لە ناکۆکی درێژخایەن و زۆرێک لەو مێژووە پڕە لە خوێنڕشتن، ناکرێت بە ئاسانی هەڵگرانی ئەم دوو بیرە جیاوازە لەژێر یەک فەرماندەییدا کۆبکەیتەوە.

بچووکترین پرسیار لە ئەمەریکا ئەوەیە: ئەوان دەزانن کە پەیوەندیی یەکێتی لەگەڵ ئێران پتەوترە لەگەڵ ئەوەی پارتی لەگەڵ ئێران، بەپێچەوانەشەوە پەیوەندیی پارتی لەگەڵ تورکیا بەهێزە تا ئاستی هاوکاریی ئەمنی، بەڵام یەکێتی لەلایەن تورکیاوە سزا دەدرێت، چونکە ناچێتە ژێر باری مەرجەکانی.  کەواتە ئەم دوو هێزە ئەگەر بشکرێنە یەک، ئەوا بە یەک ئاراستە هەنگاو نانێن. 

دوو ئایدیای جیاوازی تێدایە
لەلایەکی ترەوە هەزاران ئەفسەری پلە باڵا لەم دوو هێزەدان و سەرپەرشتی دەکەن کە خۆیان لە ساڵانی حەفتاکانی سەدەی رابردووەوە لە شاخیش هەمان رۆڵی سەربازییان هەبووە و هەڵگری بیروباوەڕی هەریەک لە یەکێتی و پارتین، ئەمەریکا ناتوانێت ئەم هزرانەیان بگۆڕێت، هەرچی وەک پێشمەرگە چەکی پێدراوە و ناوی لە وەزارەتی پێشمەرگەدا هاتووە، بە هەمان شێوە سەر بەو دوو حزبەن و زۆر لەیەک دوورن، تەنانەت ئەگەر کێشەی رواڵەتیی نێوان یەکێتی و پارتییش چارەسەر بکرێت، بەڵام ئایدیا جیاوازەکان چارەسەر نابن، هەر هیچ نەبێت ئەم دوانە رابەری یەکتریان قبووڵ نییە.

ئەگەر سوپایەکی لەو جۆرەی ئەمەریکا و هاوپەیمانەکانی خوازیارین، یەکەیەکی فکری و باوەڕ کۆیان نەکاتەوە ئەی چی یەکیان دەخات؟ مەگەر تەنها پارە و هاوکاریی سەربازی بێت، ئەگەر ئەمەش کرا ئەوا زۆر نزیکدەبینەوە لەوەی بڵێین بەڵای ئەمەش دەبێتە ڤاگنەری کوردی و ئەوان چۆنیان بووێت ئاوای بەکاردێنن.

هێزی پێشمەرگە و سوپای عیراق
ئەمەریکا ئەگەر دەیەوێت هێزی کوردستان پەرتەوازە نەبێت، با هەوڵبدات لەلایەن حکومەتی فیراڵییەوە بودجە و هاوکاریی سەربازیی تایبەتییان هەبێت و بەشداربن لە پەرچدانەوەی هەموو ئەو مەترسییانەی دێنە سەر خاکی عیراق و هەرێم، بەمەش ئەم هێزانە دەبنە بەشێک لە سوپای نیشتمانیی عیراق وەک ئەوەی وڵاتێکی فیدراڵییە.

ئەگەر ئەمەریکا لە خەمی ئەمەدایە بۆچی ناچێت ئەو هێزانە یەکبخات کە پێیان دەوترێت حەشد، جاران تەنها حەشدی شیعی بوون، ئێستا سوننی و تورکمان و کوردیش هەیانە، دیارە ئەوان ناچنە ژێر سیاسەتی ئەمەریکاوە، لێرەوە بۆمان دەردەکەوێت نییەتی ئەمەریکا سەبارەت بە یەکخستنی ئەم هێزەی پێشمەرگە کە دەیان هەزارە، بۆ چییە؟

خ.غ