مەودا میدیا-

وەزارەتی بازرگانی عیراق وەک هاوکارییەک بۆ هاوڵاتییانی هەژار بڕیاریداوە سەبەتەی خۆراک بێ بەرانبەر بەسەر هاوڵاتییانی کەمدەرامەتدا دابەشبکرێن.

موسەنا جەبار، وتەبێژی وەزارەتی بازرگانی عیراق رایگەیاند "وەزارەتەکەیان بە دوو شێوە دەستی بە پێدانی هاوکارییەکان کردووە کە یەکێکیان فرۆشتنی ماددە خۆراکییە بنەڕەتییەکان بەنرخێکی پاڵپشتیکراو لەپێناو دابەزاندنی نرخەکەیدا لە بازاڕدا کە ئەوانیش بریتین لە مادەکانی هێلکە و مریشک ئەمەش وادەکات نرخەکەی لە بازاڕەکاندا نزمببێتەوە و هاوڵاتیانی هەژار و کەمدەرامەت دەتوانن لێی سوودمەندبن".

ئاماژەی بەوەشکرد "یەکێکی دیکە لە رێگەکان ئەوەیە هەڵدەستن بە دابەشکردنی ماددەی خۆراکی بەسەر خێزانە هەژارەکاندا لەچەندین ناوچەدا لە پارێزگای بەغدا و دەوروبەریدا کە پێکدێت لە دۆشاوی تەماتە، زەیت، شیر، ساوەر و جۆرەکانی پاقلەمەنییەکان جانتای قوتابخانە و چەندین کەلوپەلی دیکە".

ئەوەشی خستووەتەڕوو "وەزارەت هاوکاری مرۆیی و پێدانی پارە و خزمەتگوزاری بە کەمدەرامەتەکان و نەخۆشەکانیان دەگەیەنێت و جل و بەرگی زستانەیان بەسەردا دابەش دەکات و جانتا بۆ قوتابییەکانیان ئامادە دەکات".

س.ر