مه‌ودا میدیا-

له‌سه‌ر ئه‌و هێرشه‌ میدیایانه‌ى ده‌كرێته‌ سه‌ر دادگای باڵای فیدراڵی، دادگاكه‌ هاته‌ ده‌نگ و ده‌ڵێت، ئەو هێرشانە، هێرشن بۆسەر سەربەخۆیی دادوەریی و رێسای یاسایی دەگرینەبەر.

لە بەیاننامەیەكیدا، دادگای باڵای فیدراڵی عیراق بڵاوى كردووه‌ته‌وه‌، رووبەڕووی هێرشی میدیایی ناوخۆیی و دەرەكی بووینەتەوە بەهۆی بڕیارەكانمانەوە، كە بۆ پاراستنی دەستوور داومانە.

ده‌شڵێت، ئەم هێرشە بە سیاسیی کراوە و ئامانجیەتی زیان بە ناوبانگی دادگاکە بگەیەنێت و شەرعییەتی دادگاکە بکاتە ئامانج.

لە بەیاننامەكه‌دا ئه‌وه‌ش هاتووه‌ ، ئەو هێرشانە، هێرشن بۆسەر سەربەخۆیی دادوەریی، كە پێویستی بە ئەنجامدانی سەرجەم رێكارە یاساییەكان هەیە بۆ وەڵامدانەوە و پووچەڵكردنەوەیان.

دوای ئه‌وه‌ى دادگای فیدراڵی عیراق چه‌ند بڕیارێكیدا، وه‌ك هەڵوەشاندنەوەی كورسی پێكهاتەكان لە هەرێمى كوردستان و گۆڕینی سیستمی هەڵبژاردن و بەبانكیكردنی مووچەی مووچه‌خۆرانى هەرێم ، لایەنی سیاسیی هه‌بووه‌ هێرشی میدیایی كردووه‌ته‌ سەر دادگاكە و بڕیارەكانی بە "نادەستووری" ناوبردووه‌.


پ ح ع