مه‌ودا میدیا-

د. بڕیار رەشید، په‌رله‌مانتارى عیراق له‌ فراكسیۆنی یەكێتیی، نوێترین زانیاری سه‌باره‌ت به‌ كردنەوەی لقی بانكەكانی رەشید و رافیدەین لە هەرێمى كوردستان ئاشكرا ده‌كات.

ده‌قى زانیارییه‌كانى ئه‌و په‌رله‌مانتاره‌ى عیراق به‌م شێوه‌یه‌یه‌:

 بەمەبەستی بەدواداچوون بۆ كردنەوەی لقەكانی لە هەرێمی كوردستان، سەردانی هەریەك لەبانكی رەشید و رافیدەین-مان كرد.

لە بەرواری (٢٠٢٤/٤/١٦ ) لەگەڵ بەڕێوبەری گشتیی بانكی رافیدەین، دكتۆر عەلی كەریم، كۆبووینەوە و دواتر لە بەرواری ( ٢٠٢٤/٤/١٨) لەگەڵ بەڕێوبەری گشتیی بانكی رەشید، محەمەد سەمیر، كۆبووینەوە.
دەرئەنجامی هەردوو كۆبوونەوە و بەدواداچوونەكانمان:-
بۆ ئەنجامدانی توتین بۆ هاوڵاتییانی هەرێم راستەوخۆ تەنها بە ناردنی ـ ناوی چواری كەسەكە
- ناوی  سیانی دایك
 - كارتی نیشتمانی
 - كارتی زانیاری
لە رێگەی وەزارەتی دارایی هەرێمەوە، بانكەكان دەتوانن تەوتین بكەن، واتە پێویستی بە هاتنی هاوڵاتییان خۆیان نییە و دواتریش لە رێگەی فەرمانگـەكانیانەوە كارتەكانیان بۆ دەنێردرێتەوە و هاوڵاتییان لە هەر ئامێرێكی ( ATM ) یاخود دەروازیەكی پارەداركردن دەتوانن مووچەكانیان رابكێشن.

كردنەوەی لقەكانی بانكەكان بۆ كارئاسانی زیاتر و سوودمەندبوونی هاوڵاتییانە لە خزمەتگوزارییەكان وەك قەرز بۆ كڕین یان دروست كردنی خانوو یان قەرز بۆ  پرۆژەی جۆراو جۆر و تەواوی خزمەتگوزارییەكانی تر.

كردنەوەی لقی دوو بانكی ناوبراو پێویستیان بە هەماهەنگی تەنها وەزارەتی دارایی عیراق و تۆماری خانووبەرە هەیە، چونكە لایه‌نەكانی تر وەك وەزارەتی دارایی عیراق و بانكەكان و بانكی ناوەندی هەموو ئامادەییان تیایە.

* شایەنی باسە ئەمە پێشتر بە نوسراو لاری نەبوونمان وەرگرتووە.
 
راستە موڵكەكانی رافیدەین و رەشید كە لەلایەن حكومەتی هەرێم بەكاردێت و بۆ دام و دەزگای تر، بەڵام ئەمە بابەتێكی سەرەكی نییە و رێگرییەكی راستی نییە لە كردنەوەی ئەو فەرعانە.

ئەم موڵكانە مەرج نییە بگەڕێندرێتەوە و مەرج نییە بەتەواوی قەرەبوو بكرێتەوە بۆ ئەو دوو بانكە، تەنها لە سەرەتادا مادام خۆیان موڵكیان هەبووە و هەیە، ئەركە لەسەر حكومەت كە موڵك (بینا)یان بۆیان دابین بكات، و ئەم بینایانە رووبەری گەورەی پێویست نییە، بەڵكو تەنها لە رووبەری  ١٥٠-٢٠٠ مەتر دەتوانن فەرعەكانیان بكەنەوە.

ئەوەی كە ئەو دوو بانكە چاوەڕوانن كۆبونەوەی هاوبەش و دروستكردنی لیژنەی هاوبەش بۆ دەستكردنی بە هەنگاوی كرداری، حكومەتی هەرێم دەخەینە بەردەم بەرپرسیاری بەدواداچون و هەماهەنگی بۆ ئەم پرسە.

بانكی رافیدەین و رەشید هەردووكی خاوەنی ئاپلیكەیشنی خۆیانن و هەموو ئەو تازەگەریانەی لە بانكی ئەهلیدا هەیە بۆ بەكارهێنەر لە شێوازی بەكارهێنان و ناردنی پارە لە رێگەی مۆبایلەوە و كڕین و هتد.. لەم دوو بانكەشدا هەیە.

پ ح ع